Կրթության եւ գիտության նախարար Արմեն Աշոտյանը իր որդու՝ «ԱՅԲ» կրթահամալիր հաճախելը համարում է էքսպերիմենտ։ Այս մասին NEWS .am-ի հետ զրույցում ասաց նախարարը՝ պատասխանելով մեր այն հարցին, թե արդյոք պետական-հանրակրթական դպրոցների մակարդակը չի բավարարում նախարարին։
«Ես իմ երեխային էքսպերիմենտի տակ եմ դրել։ Այդ դպրոցը փաստացի մասնավոր դպրոց չէ, հանրային դպրոց է, որտեղ կրթական էքսպերիմենտ է իրականացվում։ Ինչպես յուրաքանչյուր ծնող, ես նույնպես փորձում եմ իմ երեխայի համար ստեղծել կրթական այնպիսի միջավայր, որտեղ նա լավագույնս իրեն կդրսեւորի»,-ասաց նա։
Նախարարի խոսքով՝ որդին մեկ տարի պետական հանրակրթական դպրոցում է սովորել, որտեղ, սակայն, երեխայի նկատմամբ «անաչառ» վերաբերմունք չեն դրսեւորել։
«Մեկ տարի հաճախել է պետական դպրոց, որտեղ, ցավոք սրտի, ինչքան էլ ջանքեր գործադրեցինք, նախարարի երեխայի նկատմամբ ընկալումն ուրիշ է, դա երեխային փչացնում է»,-ասաց Աշոտյանը։
