Անհայտ անձինք կրակ են բացել Հոնդուրասի դիահերձարանում: Զոհվել է ինը մարդ, այդ թվում՝ սպանված տղամարդու յոթ հարազատները, որոնք եկել էին նրա մարմինը տանելու, հայտնում է Associated Press-ը՝ վկայակոչելով դատաբժշկական փորձաքննության տեղական ծառայության պետին:
Դեպքը կատարվել է օգոստոսի 19-ին՝ հյուսիսարեւմտյան Սան Պեդրո Սուլա քաղաքում: Դատաբժշկական փորձաքննության տեղական ծառայության տվյալով՝ հինգ դիմակավոր զինված անձինք երկու մեքենայով մոտեցել են դիահերձարանին եւ կրակ բացել: Զոհվել են նախօրեին սպանված տղամարդու յոթ հարազատները, որոնք եկել էին հանգուցյալի մարմնի հետեւից, ինչպես նաեւ երկու անցորդներ:
Սպանված տղամարդը, որի մարմնի հետեւից եկել էին հարազատները, գործարար էր եւ պայմանագրով աշխատում էր հարեւան Պուերտո Կորտես քաղաքի կառավարությունում: Հանցագործությունների դրդապատճառները հայտնի չեն:
Սան Պեդրո Սուլա քաղաքը մոլորակի ամենավտանգավոր բնակավայրերից է համարվում, փոխանցում է «ՌԻԱ Նովոստին»: