Լեռնային Ղարաբաղի Հանրապետությունում քրեածին իրավիճակն ապակայունացնող հանցագործությունների նախականխման ուղղությամբ ոստիկանության մարմինների կողմից բնակչության շրջանում տարված բացատրական աշխատանքների շնորհիվ 2014թ. 1-ին կիսամյակում կամավոր հանձնվել է 96 միավոր հրազեն (2013թ. 1-ին կիսամյակ` 52):
Արցախի ոստիկանության փոխանցմամբ, բնակչության մոտ դեռեւս առկա է ապօրինի պահվող զենքի եւ զինամթերքի բավականին մեծ քանակություն, որն անկասկած իր բացասական ազդեցությունն է թողնում հանրապետության քրեածին իրավիճակի ապակայունացման վրա:
Հանցագործությունների ընդհանուր թվաքանակի նվազմանը զուգընթաց արձանագրվել է ինչպես բոլոր գծերով (158-ից 124), այնպես էլ քրեական հետախուզության գծով հանցագործություն կատարած անձանց թվի նվազում (108-ից 86), որոնցից քրեական պատասխանատվության է ենթարկվել 64 անձ (93-ի դիմաց), իսկ 22-ի նկատմամբ (15-ի դիմաց) գործը կարճվել է կամ քրեական գործի հարուցումը մերժվել ոչ արդարացնող հիմքերով:
Քրեական հետախուզության գծով հանցագործություն կատարած անձանցից 8-ն ունեցել են բարձրագույն, 1-ը` թերի բարձրագույն, 7-ը` միջնակարգ-մասնագիտական, 66-ը` միջնակարգ, 4-ը` տարրական կրթություն: 3-ով (5-ից 8) աճել է հանցագործություն կատարած կանանց թիվը:
Քրեական պատասխանատվության ենթարկված անձանցից 5-ը կամ 7,8%-ն եղել են նախկինում դատված կամ դատվածությունը չմարված անձինք (2013թ. 1-ին կիսամյակ` 12 կամ 12,9%):
Ընդհանուր առմամբ հաշվետու կիսամյակում քրեական հետախուզության գծով հանցագործություն կատարած անձանց տարիքային խմբերի հարաբերակցությունը 2013թ. 1-ին կիսամյակի համեմատությամբ ունի հետեւյալ տեսքը. 14-ից 15 տարեկան` 5 (2-ի դիմաց), 16-ից 17 տարեկան` 4 (5-ի դիմաց), 18-ից 24 տարեկան` 19 (23-ի դիմաց), 25-ից 29 տարեկան` 8 (15-ի դիմաց), 30-ից 49 տարեկան` 37 (51-ի դիմաց), 50 տարեկան եւ ավելի` 13 (12-ի դիմաց):
Հաշվետու կիսամյակում քրեական պատասխանատվության ենթարկված անչափահասների թվաքանակն աճել է 2-ով (7-ից 9), իսկ նրանց կողմից կատարված հանցագործությունների քանակը` նվազել 6-ով (10-4): Կատարված հանցագործությունները 1-ով (0-ից 1) աճել են Շուշիի եւ Քաշաթաղի շրջաններում:
Անչափահասների կողմից կատարված 4 հանցագործությունները գողության, գողության փորձի, կողոպուտի եւ իշխանության ներկայացուցչի նկատմամբ բռնություն գործադրելու 1-ական դեպքեր են, այսինքն` արձանագրվել են ինչպես ոչ մեծ ծանրության, միջին ծանրության, այնպես էլ ծանր հանցագործության դեպքեր:
Արձանագրվել են նաեւ 34 անչափահասների կողմից կատարված 26 հանցագործություններ (2013թ. 1-ին կիսամյակ` 30-25), որոնցով նախապատրաստված նյութերով քրեական գործի հարուցումը մերժվել է տարբեր հիմքերով:
