Ազատ դեմոկրատներ կուսակցությունը խստորեն դատապարտում է Իրաքի հյուսիսային շրջաններում բնակվող եզդիների նկատմամբ իրականացվող դաժանությունները:
Կուսակցության տարածած հայտարարության մեջ ասվում է. «Դրանք հիրավի կարող ենք ցեղասպանություն անվանել, քանզի արդեն իսկ հայտնի է մեծ թվով սպանվածների, առեւանգվածների եւ փախստականների մասին: Ավելին` Մերձավոր Արեւելքում բնակվող եզդիները փաստացիորեն ստիպված են տեղահանվել իրենց պատմական տարածքներից:
Մնք կոչ ենք անում միջազգային հանրությանը եւ միջազգային ազդեցիկ կառույցներին աչալրջորեն հետեւել Իրաքում տեղի ունեցող իրադարձություններին եւ օր առաջ կանխել այնտեղ իրականացվող ոճիրը: 21-րդ դարում քաղաքակիրթ աշխարհը իրավունք չունի թուլ տալու նոր ցեղասպանություններ եւ պետք է գործուն քայլեր ձեռնարկվեն, որպեսզի չկրկնվեն 20-րդ դարասկզբից մարդկությանը որպես ծանր ժառանգություն հասած ցեղասպանությունները:
Ազատ դեմոկրատներ կուսակցությունը հայտնում է իր զորակցությունը բարեկամ եզդի ժողովրդին: Այս օրերին մեր բոլորիս պարտքը պետք է լինի սատարել եզդիներին եւ հնարավորինս գործուն քայլեր իրականացնել այդ ուղղությամբ»:
