Տեսահոլովակի հրապարակումից հետո, որում պատկերված է «Իսլամական պետության» գրոհայինների կողմից ամերիկացի լրագրողի սպանությունը, Իրաքի կառավարությունը հանդես եկավ ջիհադականների դեմ պայքարին միանալու՝ միջազգային հանրությանն ուղղված կոչով:
Խմբավորումը սպառնում է ոչ միայն հենց Իրաքի բնակչության որոշ խմբերին, այլեւ ամբողջ աշխարհին: «Deutsche Welle»-ի ռուսական ծառայության փոխանցմամբ՝ օգոստոսի 20-ին «Reuters»-ին տված հարցազրույցում այս մասին հայտարարել է Իրաքի ԱԳ նախարար Հոշիյար Զեբարին:
Նախարարն ընդգծել է, որ Իրաքն իսլամիստների դեմ պայքարում կախված է այլ երկրների աջակցությունից: Միաժամանակ, Զեբարին հաստատել է, որ ինքը եւ մի քանի քուրդ նախարարներ դարձյալ Իրաքի կառավարության մեջ են ընդգրկվել: Մի քանի շաբաթ առաջ, ի նշան բողոքի այն ժամանակվա վարչապետ Նուրի ալ-Մալիքիի դեմ, Զեբերին ու նրա մի շարք գործընկերներ հեռացել էին կառավարությունից: