Խոշոր գործարարներին ստվերից հանելու համար Հայաստանի կառավարությունն իր առջեւ երբեք ժամկետներ չի դրել, իսկ նրանք, ովքեր տուգանվել են ստվերում գործելու պատճառով, չպետք է իշխանություններից նեղանան: Այս մասին այսօր՝ օգոստոսի 20-ին, լրագրողների հետ զրույցում հայտարարեց Հայաստանի վարչապետ Հովիկ Աբրահամյանը:
«Մեզ ոչ ոք ժամանակ չի տվել: Ես ասել եմ, որ հուլիսի 1-ից բոլորս պետք է աշխատենք միասին, հավասար պայմաններում եւ, ինչպես գիտեք, հոկտեմբերի 1-ից մեր շրջանառության հարկը 3.9%-ից դառնալու է 1%, եւ փաստաթղթավորումը դառնալու է պարտադիր բոլորի համար: Իսկ այս ընթացքում Ֆինանսների նախարարությունը հանրությանն ու կառավարությանը պարբերաբար հաշվետվություններ է ներկայացնում կատարված աշխատանքների վերաբերյալ: Նորից եմ ասում, որ մենք մեկ անգամից չենք կարող ստվերը վերացնել, բայց ժամանակի ընթացքում կհասնենք դրան»,- ասաց վարչապետը:
Լրագրողների դիտարկմանն ի պատասխան, թե տուգանված ընկերությունների թվում են ԱԺ ՀՀԿ խմբակցության պատգամավորներ Սամվել Ալեքսանյանին եւ Արման Սահակյանին պատկանող «Ալեքս Գրիգ» ընկերությունն ու «Կրպակ» խանութների ցանցը՝ վարչապետը խնդրեց անուններ չտալ. «Բոլորն օրենքի առջեւ հավասար են, չգիտեմ էլ՝ ում են պատկանում այդ ընկերությունները, բայց եթե պետք լինի՝ կիմանամ: Մի բան հստակ է. ոչ ոք իրավունք չունի մեզանից նեղանալ, բոլորը պետք է աշխատեն հավասար պայմաններով»:
Նշենք, որ վարչապետ նշանակվելու առաջին օրերից Հովիկ Աբրահամյանը խոսում էր խոշոր գործարարներին ստվերից հանելու մասին եւ պնդում, որ նրանց բոլորին մինչեւ հուլիսի 1-ը ժամանակ է տվել՝ կամավոր հարկային դաշտ գալու համար: