Հայաստանի կառավարությունը պատրաստ է ֆինանսական եւ կազմակերպչական օգնություն տրամադրել այն գործարարներին, ովքեր ցանկանում են իրենց ապրանքն արտահանել Ռուսաստանի Դաշնություն: Այս մասին այսօր՝ օգոստոսի 20-ին, լրագրողների հետ զրույցում հայտարարեց Հայաստանի վարչապետ Հովիկ Աբրահամյանը՝ պատասխանելով հարցին, թե ինչ է արվում հայ գործարարների արտադրանքը Ռուսաստան արտահանելու համար:
«Բոլոր գործարարներին երկու օր առաջ հրավիրել էինք եւ խոսել այն մասին, թե ինչ անենք, որ կարողանանք մեր ապրանքն արտահանել: Մենք ասել ենք, որ պատրաստ ենք բոլոր հարցերում օգնել, մնացածն արդեն ընթացքում կերեւա»,- հավելեց վարչապետը:
Նշենք, որ Եվրասիական տնտեսական միության անդամ դառնալու դեպքում Հայաստան ներկրվող շուրջ 800 անուն-ապրանքների համար նոր մաքսատուրք կսահմանվի, իսկ Հայաստանից արտահանվող ապրանքների պայմանների վերաբերյալ դեռեւս ոչ մի խոսակցություն չկա: Այնուամենայնիվ, տնտեսագետները համոզված են, որ հայկական արտադրանքը մրցունակ չի լինի ԵՏՄ անդամ պետություններում, որտեղ իրենց սեփական արտադրանքն ավելի էժան կլինի հայկականից: