«Ժամանակ» թերթը գրում է. «ԲՀԿ անդամ Ստեփան Մարգարյանը հայտարարել է, որ քառյակի ծրագրերում ոչինչ չի փոխվել, եւ կարող են անհրաժեշտության դեպքում եւ չորս առաջնորդները հանդիպել, եւ կլինի նաեւ համատեղ հանրահավաք։

ԲՀԿ ներկայացուցիչը հայտարարել էր նաեւ, որ ՀԱԿ-ԲՀԿ տարակարծությունների մասին ոչինչ չի լսել:
Հիշեցնենք, որ խոսքը ոչ իշխանական քառյակի մասին է, որի անդամներից երեքի ներկայացուցիչները՝ ՀԱԿԿ-ից բացի, Հովիկ Աբրահամյանի հետ մեկնել էին սահմաններ PR-ի, ինչպես հենց ՀԱԿԿ-ն էր բնորոշել այդ այցը՝ հայտարարելով դրանից հրաժարվելու մասին:

Սակայն ոչ մի կասկած ունենալ պետք չէ, որ աշնանը ոչ իշխանական քառյակը վերստին ակտիվանալու է եւ վերստին սկսելու է հուժկու իմիտացիաները: Խնդիրն այն է, որ քառյակի ոչ մի ուժ, ըստ էության, չունի առանձին որեւէ անելիք, եւ նրանք իրար խիստ անհրաժեշտ են իմիտացիայի համար: Որեւէ մեկը եթե չորսից պոկվի, ապա պետք է անի չորսի իմիտացիաներից տարբերվող որեւէ բան, պետք է որեւէ այլ արդյունք ցույց տա:

Մինչդեռ չորս ուժերը որեւէ արդյունք ցույց տալ անկարող են` եւ՛ միասին, եւ՛ առանձին-առանձին: Անկարող են, որովհետեւ, ինչպես նրանց գործունեությունը մինչեւ հիմա է ցույց տվել, այդ ֆորմատն, ըստ էության, տեղավորվել է եւ տեղավորվելու է իշխանական համակարգի տրամաբանության մեջ: Այդ ֆորմատը ընդամենը ներիշխանական համակարգային հարաբերությունների պարզաբանման արգասիք է, եւ չորսի գործունեությունը, ըստ էության, կարգավորվում է ըստ այդ ներիշխանական հարաբերությունների»:

Առավել մանրամասն` թերթի այսօրվա համարում