Լեռնային Ղարաբաղի Հանրապետության Գանձասարի վանական համալիրում կբացվի Մատենադարանի (հնագույն հայկական ձեռագրերի ինստիտուտի) մասնաճյուղը: Այդ մասին լրագրողների հետ զրույցի ընթացքում հայտարարեց Լեռնային Ղարաբաղի Հանրապետության Մշակույթի եւ երիտասարդության հարցերով նախարար Նարինե Աղաբալյանը:
Նախարարը նշեց, որ Գանձասարում ձեռագրերի պահպանման համար ստեղծված են բարենապաստ պայմաններ, այստեղ կգործի դրանց հետազոտման գիտական կենտրոնը. «Մատենադարանից կփոխանցվեն այն ձեռագրերի կրկնօրինակները, որոնք պահպանվել են Ղարաբաղում եւ ժամանակին փոխանցվել Հնագույն ձեռագրերի ինստիտուտին: Կփոխանցվեն նաեւ օրիգինալ ձեռագրեր»:
Բացի այդ, Տիգրանակերտում եւ Ազոխի քարանձավում շարունակվում են հնագիտական պեղումները: Ինչպես նշեց նախարարը, Տիգրանակերտի պեղումները ֆինանսավորվում են պետության միջոցներով, իսկ Ազոխի քարանձավում պեղումներ է իրականացնում նաեւ միջազգային գիտական արշավախումբը: