Սեպտեմբերին Ուելսում կայանալիք գագաթնաժողովին ՆԱՏՕ-ն Վրաստանի պաշտպանական հնարավորությունների ամրապնդման նպատակներով նախատեսում է «ծանրակշիռ փաթեթ» ընդունել, օգոստոսի 20-ին հեռախոսազրույցի ընթացքում իր վրացի գործընկերոջը՝ Գեորգի Մարգելաշվիլիին հայտնել է Լիտվայի նախագահ Դալյա Գրիբաուսկայտեն:
Լիտվայի նախագահի աշխատակազմը հաղորդում է, որ ՆԱՏՕ-ն նաեւ «մտադիր է հաստատել դաշինքում Վրաստանի ապագայի վերաբերյալ իր դիրքորոշումը»:
Երկու երկրների նախագահները հեռախոսազրույցի ընթացքում քննարկել են տարածաշրջանային անվտանգության հարցերն ու ՆԱՏՕ-ի առաջիկա գագաթնաժողովի նախապատրաստությունները:
«Շատ կարեւոր է, որպեսզի Վրաստանը շարունակի իր ժողովրդի համար կարեւոր բարեփոխումների իրականացումը, որոնք ուղղված են երկրում ժողովրդավարության եւ օրենքի գերակայության ամրապնդմանը, - նշել է նախագահը», - ասվում է հաղորդագրության մեջ:
Հունիսին տեղի ունեցած հանդիպման ժամանակ ՆԱՏՕ-ի երկրների ԱԳՆ-երը որոշում էին կայացրել, որ անդամակցության գործողությունների պլանը Վրաստանին տրամադրելու հարցը գագաթնաժողովի օրակարգում չի հայտնվի, դրա փոխարեն նրանք պայմանավորվել են Վրաստանին «ծանրակշիռ փաթեթ» ներկայացնել, որը օգնի երկրին դաշինքի հետ հետագա մերձեցման ճանապահին», հաղորդում է Civil Georgia-ը: