Վրացական կառավարության պատվիրակությունը՝ վարչապետ Իրակլի Գարիբաշվիլիի գլխավորությամբ, այսօր՝ օգոստոսի 21-ին, երկօրյա պաշտոնական այցով ժամանել է Հայաստան:
Վրաստանի պատվիրակության կազմում ընդգրկված են արտաքին գործերի նախարար Մայա Ձանջիկիձեն, էկոնոմիկայի եւ տնտեսական զարգացման նախարար Գեորգի Կարիկաշվիլին, էներգետիկայի նախարար Կախա Կալաձեն:
Վրաստանի վարչապետին ուղեկցում են նաեւ պատգամավոր Ռուսլան Պողոսյանը, Վրաստանի կառավարության աշխատակազմի փոխղեկավար Նինո Կոբախիձեն, Անվտանգության խորհրդի եւ ճգնաժամային կառավարման նախագահ Մինդիա Ջանելիձեն:
Վրացական պատվիրակության այցը մեկնարկել է Զվարթնոցի միջազգային օդանավակայանում՝ պաշտոնական արարողությամբ: Սպասվում է, որ այցի շրջանակներում Իրակլի Գարիբաշվիլին կհանդիպի Հայաստանի վարչապետ Հովիկ Աբրահամյանի հետ, որից հետո ընդլայնած կազմով կհանդիպեն Վրաստանի եւ Հայաստանի կառավարության ներկայացուցիչները: Հանդիպումից հետո Գարիբաշվիլին եւ Աբրահամյանը մամուլի համար հանդես կգան համատեղ հայտարարությամբ, հաղորդում է «Նովոստի Գրուզիան»:
Օգոստոսի 21-ի երեկոյան երկու երկրների վարչապետները կրկին կհանդիպեն պաշտոնական ընթրիքի ժամանակ: