Հայաստանի բեռնատարները Վերին Լարս-Կազբեգ անցակետով Ռուսաստան մեկնումները ժամանակավորապես կհետաձգեն: Այս մասին NEWS.am-ի թղթակցին ասաց բեռնափոխադրող «Սաթի» ընկերության գլխավոր տնօրեն Մակար Առաքելյանը՝ անդրադառնալով վրաց-ռուսական սահմանի մոտի մայրուղում գիշերվա 3-ի սահմաններում տեղի ունեցած փլուզումը:
«Իհարկե, խցանման մեջ են մնացել բեռնատարներ Հայաստանից ՝ եւ վրացական, եւ ռուսական կողմում: Մեր գնահատմամբ՝ ոչ այնքան շատ, սակայն դեռ ճշգրիտ չգիտենք՝ որքան», - նշել է Առաքելյանը: Ըստ նրա՝ Հայաստանի բեռնափոխադրողները մայրուղու մաքրման ժամկետների վերաբերյալ դեռ տվյալներ չունեն:
Նշենք, Հայաստանի տրանսպորտի փոխնախարար Արթուր Առաքելյանն ավելի վաղ հայտնել էր, որ ճանապարհն այս պահին փակ է: Խնդիրներ էին ծագել «Հյուսիսային Կովկաս-Անդրկովկաս» գազատարի հետ, որով ռուսական գազը Հայաստան է մտնում: Օգոստոսի 20-ի երեկոյան ժամը 11-ի սահմաններում այն անջատվել էր: