2014թ. առաձին կիսամյակում Հայաստանի եւ Վրաստանի միջեւ առեւտրաշրջանառությունը աճել է 42%-ով: Այս մասին օգոստոսի 21-ին ՀՀ կառավարությունում հայ գործընկեր Հովիկ Աբրահամյանի հետ համատեղ ասուլիսում հայտարարել է Վրաստանի վարչապետ Իրակլի Ղարիբաշվիլին:
Ըստ նրա՝ դրական տենդենց է նկատվում զբոսաշրջային այցերի ոլորտում:
«Այս ամենը խոսում է այն մասին, որ մեր երկու երկրների միջեւ տնտեսական հարաբերությունները զարգանում են, եւ մենք, իհարկե, կաջակցենք այդ միտմանը: Մեր այցը բարեկամական Հայաստան հենց այդ նպատակին է ծառայում», - հայտարարել է Ղարիբաշվիլին:
Նա Հովիկ Աբրահամյանին շնորհակալություն է հայտնել ջերմ ընդունելության համար եւ ուրախություն հայտնել Հայաստան այցի կապակցությամբ, որի հետ Վրաստանը կապված է բազմադարյա բարիդրացիական կապերով: Վրաստանի վարչապետը նաեւ նշել է երկկողմ կապերի աշխուժացման կարեւորությունը ոչ միայն բարձր մակարդակով, այլեւ՝ միջգերատեսչական:
