Վերին Լարս-Կազբեգ սահմանային անցակետի մոտի գազատարը նախատեսվում է վերագործարկել 2 – 3օրից: Այս մասին օգոստոսի 21-ին ՀՀ կառավարությունում հայ գործընկեր Հովիկ Աբրահամյանի հետ համատեղ ասուլիսում հայտարարել է Վրաստանի վարչապետ Իրակլի Ղարիբաշվիլին:
«Մենք ՀՀ վարչապետի հետ քննարկեցինք գիշերը մայրուղում տեղի ունեցած սողանքի հետեւանքները եւ պատրաստակամություն հայտնեցինք վերականգնել գազամատակարարումը 2-3 օրվա ընթացքում», - նշել է Ղարիբաշվիլին:
Այսօր «Գազպրոմ Հայաստան» ՓԲԸ-ն հայտնել էր, որ ընկերությունը պաշտոնական ծանուցում է ստացել Վրաստանի Գազատրանսպորտային ընկերությունից՝ օգոստոսի 20-ի 23:45-ից Հայաստան գազի մատակարարումը ժամանակավորապես դադարեցնելու վերաբերյալ՝ Վրաստանի տարածքում «Հյուսիսային Կովկաս-Անդրկովկաս» գազատարի վթարի պատճառով: ՀՀ-ի սպառողների անխափան գազամատակարարումը կապահովվի ներքին ռեսուրսների հաշվին:
