News
Լրահոս
News
Երեքշաբթի
Մարտ 19
Տեսնել լրահոսը


Մի քանի տարի առաջ Արագածոտնի մարզի Ավան համայնքով անցնող Ամբերդ գետի վրա Իրանի քաղաքացին ՀԷԿ է կառուցել, ինչի հետեւանքով համայնքի վեց գյուղերը զրկվել են ոռոգման ջրից։ Այս մասին այսօր՝ օգոստոսի 21-ին, NEWS.am-ին ասացին համայնքի բնակիչները, որոնք Կառավարություն էին գնացել՝  իրենց բողոքը ներկայացնող նամակ հանձնելու վարչապետին:

 «Մարզից օգնություն չստանալով՝ ստիպված մի քանի հոգով եկել, հասել ենք վարչապետի մոտ: Վարչապետի անունով նամակ ենք բերել եւ ուզում ենք, որ վարչապետը մեր գյուղացիներին ընդունի»,- NEWS.am-ին ասաց Ավան գյուղի բնակիչ Սարգիս Արշակյանը:

Գյուղացիների խոսքով՝ եթե վարչապետը  պատրաստակամություն հայտնի ընդունել իրենց, իրենք պատրաստ են ամբողջ գյուղով ոտքով հասնել Երեւան:

«6 տարի առաջ առանց գյուղի բնակիչների գիտության գյուղապետը կառուցելու համար թույլտվության թուղթ էր տվել մի պարսիկի, որը եկել, մեր սարերում ԳԷՍ է կառուցել, հիմա պարսիկը ԳԷՍ-ը աշխատացնում է, որի հետեւանքով ջուրը չի հասնում մեր դաշտերին, մեր անասուններին»,- վրդովված ասաց Սարգիս Արշակյանը:

Գյուղացիները նշեցին, որ սա առաջին անգամը չէ, որ իրենք բողոքում են, սակայն ոչինչ չի փոխվել։

«Բողոքել ենք մարզպետին, տեղական իշխանություններին, ոչ մի օգնություն չենք ստանում: Մարզպետն ասում է՝ կգամ, լավ կլինի, բայց ոչ մի օգնություն չկա: Անցյալ տարի եկանք, Գյումրի-Երեւան տռասան փակեցինք, էլ միլիցիայի պետ, էլ բան, թե՝ գնանք պարսիկի մոտ, պայմանավորվենք, կլուծենք, բայց ոչ մի լուծում չեղավ, ոչ մի օգուտ չեղավ»,- դժգոհեցին գյուղացիները:

Ավանի գյուղապետ Գևորգ Գալստյանը, սակայն, հերքում է գյուղացիների պնդումները, թե ջրամատակարարման խնդիրների պատճառը ՀԷԿ-ն է։

 «Այդ մարդիկ պետք է, չէ՞, մեկին մեղավոր գտնեն: Իրականում ջրամատակարարման խնդիրը կապված է գետի ջրի մակարդակի նվազեցման հետ, այլ ոչ թե պարսիկի»,- NEWS.am-ի հետ զրույցում ասաց գյուղապետը՝ նշելով, որ այսօր ժամը 17։00-ին նախատեսվում է այս հարցով հանդիպում Արագածոտնի մարզպետի հետ։

«Մտածում ենք՝ կողքի 7000 բնակիչ ունեցող Բյուրական գյուղի հետ պայմանավորվել, շաբաթվա կեսը մեր գյուղը օգտագործի ջուրը, մյուս կեսը՝ իրենք»,-  ասաց Գեւորգ Գալստյանը։

Գյուղացիները, սակայն, այլեւս մտադիր չեն հանդուրժել այս վիճակը։ Անցած տարի նրանք փակել էին Երեւան-Գյումրի մայրուղին, եւ հիմա էլ պատրաստ են ծայրահեղ քայլերի դիմել, եթե հարցին վերջնական լուծում չտրվի։

«Հիմա վերջնականապես այդ հարցը պետք է լուծվի, էդ պարսիկը, որ եկել է, տիրում է, մի օր գյուղը կտեղափոխի Պարսկաստան։ Պիտի տիրություն անեն, թող լիճ սարքեն, ինչ ուզում են՝ անեն: Մենք պահանջում ենք, որ փրկեն մեր գյուղը»,- ասաց Սարգիս Արշակյանը։

Նշենք, որ ըստ ՀՀ ԱՆ պետական ռեգիստրի տվյալների՝ «Ամբերդ ՀԷԿ»-ի հիմնադիրներն են ԻԻՀ քաղաքացի Փավրիզ Նոսրաթի Ալամդարը եւ ՀՀ քաղաքացի Գուրգեն Հակոբյանը։

Տպել
Կարդացեք նաև
Ամբողջը
2024-ի. փետրվարին 431 հարկ վճարողի մոտ արձանագրվել է «Անկանխիկ գործառնությունների մասին» ՀՀ օրենքի պահանջների խախտում
Պետական եկամուտների կոմիտեն ներկայացնում է 2024 թ. փետրվար ամսվա…
Հայաստանը մտադիր է վավերացնել Գերմանիայի հետ համաձայնագիրը՝ 12 մլն եվրո ստանալու նպատակով
Հայաստանը մտադիր է վավերացնել Գերմանիայի հետ համաձայնագիրը...
ՀՀ-ում փողոցային շարժական առեւտուրը կկարգավորվի նաեւ մարզերում. փոխնախարար
Փողոցային շարժական առեւտուրը կկարգավորվի նաեւ մարզերում...
Համլետ Սահակյանը նշանակվել է ՊԵԿ նախագահի առաջին տեղակալ
Ղեկավարվելով «Հանրային ծառայության մասին» օրենքի 9-րդ հոդվածի 4-րդ մասով...
«Fly Arna» ավիաընկերության լիցենզիան դադարեցվել է ինքնաթիռներ չունենալու պատճառով. փոխնախարար
«Fly Arna» ավիաընկերության լիցենզիան դադարեցվել է...
ՀՀ-ում կզրկեն արտասահմանում կազմակերպված ինտերնետ տոտալիզատորներին մասնակցելու հնարավորությունից
Պետք է արգելվի արտասահմանում կազմակերպված ինտերնետ տոտալիզատորներին մասնակցելու հնարավորությունը...
Ամենաշատ