ՀԱՄԱՍ-ի գրոհայինները հայտարարել են, որ Գազայի հատվածի հարավային Ռաֆահ քաղաքում Իսրայելի ավիահարվածների հետեւանքով զոհվել են խմբավորման երեք պարագլուխներ, հայտնում է lenta.ru-ն՝ վկայակոչելով The Guardian-ը:
Ըստ թերթի՝ սպանվել են Մուհամեդ Աբու Շամալան, Մուհամեդ Բարհումը եւ Ռաեդ Աթարը: Օգոստոսի 21-ի գիշերը Իսրայելի հարձակման զոհ է դարձել ութ պաղեստինցի: Ռաֆահում հրեական պետության ՌՕՈՒ-ի հարվածների արդյունքում ամբողջությամբ ավերվել է բնակելի քառահարկ մի շենք:
«ՌաեդԱթարը Իսրայելի տարածքում կազմակերպել էր գրոհայինների ահաբեկչական հարձակումներ, ինչպես նաեւ պատանդների առեւանգում, մասնավորապես՝ զինվոր Գիլադ Շալիթի առեւանգումը: Մուհամեդ Աբու Շամալան նույնպես կազմակերպել է տասնյակ ահաբեկչություններ», — ՑԱԽԱԼ-ի ներկայացուցչի խոսքերն է մեջբերում թերթը:
Նախկինի պես անհայտ է ՀԱՄԱՍ-ի եւս մեկ ռազմական առաջնորդի՝ Մուհամեդ Դեյֆի ճակատագիրը: Օգոստոսի 20-ին օդային հարվածի հետեւանքով զոհվել են նրա կինն ու նորածին երեխան: Ենթադրվում է, որ Դեյֆին հաջողվել է փրկվել:
«Անխորտակելի ժայռ» գործողությունը, որն Իսրայելն սկսել է Գազայի հատվածում՝ հուլիսի 7-ից, խլել է 2 հազար պաղեստինցու եւ 70 իսրայելցու կյանք: