Հայաստանում այս տարի ամառն առանձնահատուկ է: Նույնիսկ տեղի բնակիչներն են այդ զգում: Ամեն ինչ փոքր-ինչ տարօրինակ, փոքր-ինչ արտասովոր եւ բացարձակ տարբեր է թվում: Շոգ է: Ոչ թե «նորմալ» շոգ, այլ այն աստիճան անտանելի չոր ու տապ, որ նույնիսկ շարժվելն անհնար է: Այս մասին կալիֆորնիական «Glendale News-Press» պարբերականում գրում է Լոս Անջելեսից լրագրող Լիանա Աղաջանյանը:
Ըստ նրա, արեւը ցամաքեցնում է բոլորի էներգիան, զրկում նույնիսկ տարրական աշխատանք կատարելու ունակությունից: Թեթեւություն պարգեւող միակ բանը պաղպաղակի եւ ձմերուկի անսահման քանակությունն է:
«Դրա դեմ պայքարելն անհնար է դարձել, բայց, ամեն դեպքում, այդ շոգը ոչնչով չի տարբերվում Լոս Անջելեսի շոգից: Բացառությամբ այն բանի, որ, ի տարբերություն Լոս Անջելեսի, այս քաղաքն անցանելի է հետիոտնի համար: Իսկ երբ քաղաքն անցանելի է հետիոտնի համար, հարկավոր է օգտվել առիթից: Օդորակիչով ավտոմեքենայում կամ շենքում նստելն աշխարհի այս հատվածում չի գործում, ամեն դեպքում՝ այնքան էլ չի համապատասխանում քաղաքի տրամադրությանը»,- գրել է լրագրողը:
Լուսանկարը՝ Արսեն Սարգսյանի