Ղարաբաղի եւ Ադրբեջանի շփման գծում վերջին մեկ ամսվա ընթացքում վիրավորված 7 զինծառայողներից 4-ն արդեն դուրս են գրվել «Մուրացան» հոսպիտալից եւ այժմ արձակուրդի մեջ են: Այս մասին NEWS.am-ին ասաց պաշտպանության նախարարի մամուլի խոսնակ Արծրուն Հովհաննիսյանը:
«3-ը դեռ շարունակում են բուժումը հոսպիտալում, նրանց վիճակն էլ բարվոք է, սակայն դեռ բուժման կարիք ունեն: Մյուս դուրս գրված հիվանդներն այս պահին արձակուրդում են, ընթացքում կորոշվի, թե ով կանցնի նորից ծառայության, ով ոչ: Այս մասին դեռ վաղ է խոսելը»,- ասաց նա:
Նշենք, որ վիրավորված զինծառայողներն են կապիտաններ Սրապիոն Մելքոնյանն ու Սարգիս Ստեփանյանը, շարքայիններ Արմեն Պետրոսյանը, Նորայր Քամալյանը, Գրիգոր Գրիգորյանը, Վարուժան Մարգարյանը, Բենիկ Պետրոսյանը:
Հիշեցնենք, որ վերջին օրերին ադրբեջանական կողմը շփման գոտի դիվերսիոն ներթափանցման մի շարք փորձեր է ձեռնարկել, սակայն բոլոր դեպքերում հակառակորդը հետ է շպրտվել: Պաշտոնական Բաքուն հայտնել է ավելի քան 26 զինծառայողների մահվան եւ երեք տասնյակի վիրավորման մասին:
Լուսանկարը՝ Արսեն Սարգսյանի/NEWS.am