2012թ. ապօրինաբար պետական սահմանը հատելու համար 1,5 տարվա ազատազրկման դատապարտված Ադրբեջանի Ազգային ճակատ ընդդիմադիր կուսակցության անդամ Ռասուլ Մուրսալովը թաքնվում է Վրաստանում օտարերկրյա պետություններից մեկի դեսպանատանը: Այդ մասին «Ենի Մուսավաթ» ադրբեջանական թերթին հայտարարել է ինքը՝ Մուրսալովը:
Նրա խոսքով՝ Ադրբեջանում նրա նկատմամբ հայրենիքին դավաճանության եւ խարդախության հոդվածներով քրեական գործ է հարուցվել:
Ընդ որում, հայրենիքին դավաճանության հոդվածով քրեական գործը հարուցվել է այն բանից հետո, երբ օգոստոսի 1-4-ը Վրաստանում ակտիվիստը մասնակցել է հայ ակտիվիստների հետ հանդիպմանը: Երկրորդը գործը 6 տարի առաջ ադրբեջանական բանկերից մեկից ստացած վարկի պատճառով է:
«Իմ նկատամամբ հայրենիքի դավաճանության մեղադրանքով քրեական գործ է հարուցվել: Մեղադրանքը հիմնավորում են օգոստոսի 1-4-ին Վրաստանում անցկացված միջոցառման շրջանակներում հայերի հետ իմ հանդիպումներով: Այնտեղ մենք քննարկել ենք ղարաբաղյան հակամարտության խաղաղ կարգավորման ուղիները», - ասել է Ռասուլ Մուրսալովը:
Նրա խոսքով՝ Ադրբեջան վերադառնալու դեպքում նրան ցմահ ազատազրկում է սպառնում:
«Անվտանգության նկատառումներով ես չեմ կարող ասել իմ գտնվելու վայրը: Վրաստանում ես թաքնվել եմ օտարերկրյա դեսպանատներից մեկում: Հավանաբար, հետագայում կմեկնեմ Եվրոպա», - պատմել է Մուրսալովը: