Ահմեդ Դավութօղլուն Անկարայի արտաքին քաղաքականության կուրսը որոշող կերպարն է, հետեւաբար նրա նշանակումով հայ-թուրքական հարաբերություններում որեւէ փոփոխություն չի լինի: NEWS.am-ի հետ զրույցում Դավութօղլուի՝ վարչապետ նշանակվելուն այսպես արձագանքեց Ստամբուլում հրատարակվող «Ժամանակ» թերթի խմբագիր Արա Գոչունյանը։
«Դավութօղլուն վերջին 12 տարիներին միշտ կարեւոր պաշտոններ է զբաղեցրել, առաջին շրջանում եղել է վարչապետ Էրդողանի՝ արտաքին քաղաքականության գծով գլխավոր խորհրդական, իսկ հետո արդեն արտգործնախարար: Ահմեդ Դավութօղլուն Անկարայի արտաքին քաղաքականության կուրսը որոշող կերպարն է: Հետեւաբար, վարչապետ նշանակվելուց հետո արտաքին քաղաքականության մեջ էական փոփոխություններ չպետք է լինեն: Հաշվի առնելով, որ հայ-թուրքական հարաբերություններում այս տարիների ընթացքում որոշում կայացնողներից մեկն էլ հենց Դավութօղլուն է, փոփոխություն չի լինի»,- ասաց նա:
Նշենք, որ օգոստոսի 21-ին Թուրքիայի իշխող «Արդարություն եւ զարգացում» կուսակցության համագումարի ժամանակ արդեն նախագահ ընտրված Ռեջեփ Թայիփ Էրդողանը հայտարարել է, որ Թուրքիայի նոր վարչապետը Ահմեդ Դավութօղլուն է, որը մինչ այս ղեկավարել է Թուրքիայի արտաքին գերատեսչությունը։