Հատուկ ծառայություններին հաջողվել է հաստատել Ջոն «Բիթլի» ինքնությունը, ով խոսում է Լոնդոնի բնակիչներին հատուկ խոսվածքով՝ քոքնիով: Այդ մասին գրում է բրիտանական Sun թերթը ամերիկացի լրագրող Ջեմս Ֆոուլիի մարդասպանի մասին հոդվածում:
Պարբերականի տեղեկություններով՝ «խոսքը իսլամ ընդունած երիտասարդ բրիտանացու մասին է, ով ծայրահեղական իսլամիստների խմբի հետ Թոուեր Հեմլեթ լոնդոնյան թաղամասից որոշ ժամանակ առաջ ուղեւորվել էր Սիրիա»: Հոդվածի հեղինակները նշում են, որ Սիրիայում, Իրաքում եւ Լիբանանում իսլամիստական ահաբեկչական խմբավորումների կազմում գտնվող Մեծ Բրիտանիայի 500 քաղաքացիներից կեսը «Լոնդոնի նախկին բնակիչներ են», - հաղորդում է «ԻՏԱՌ-ՏԱՍՍ»-ը:
BBC-ի ռադիոկայանը նշել է, որ «Իսլամական պետություն» շարժման զինյալների մի խումբ «մասնագիտանում է արեւմտյան պատանդներ գտնելու մեջ»: BBC-ի տվյալներով՝ այժմ «զինյալների կողմից գերեւարվածների թիվը անցնում է երկու տասնյակից»:
Որոշ տվյալների համաձայն, վերջին ամիսներին Արեւմուտքի մի շարք երկրների հատուկ ծառայությունների կողմից այդ պատանդներին ազատ արձակելու բազմաթիվ քայլեր են ձեռնարկվել: Նրանց մի մասը, այդ թվում՝ Ֆրանսիայի քաղաքացին, ազատ էր արձակվել փրկագնի դիմաց: «Ջեյմս Ֆոուլիի համար, ում եղբայրը ծառայում է ԱՄՆ-ի զինված ուժերում, Իսլամական պետության զինյալնրը 132 մլն դոլար փրկագին են պահանջել», - նշում է BBC-ն: