Ուկրաինայի նախագահի որդի Ալեքսեյ Պորոշենկոն ծառայում է երկրի հարավ-արեւելքի հակաահաբեկչական գործողության գոտում, հայտարարում են ուկրաինական լրատվամիջոցները:
Վինիցայի մարզային խորհրդի 29-ամյա պատգամավորը տանը թողել է երեք ամսական որդուն՝ Պետյային, կնոջը՝ Յուլյային եւ գաղտնի մեկնել կռվելու, պատմել են Պորոշենկոյի շրջապատի աղբյուրները:
Ըստ աղբյուրների՝ չորս շաբաթ առաջ Ալեքսեյը ծանուցում էր ստացել:
«Այժմ նա ծառայում է հակաահաբեկչական գործողության գոտու ստորաբաժանումում: Հնարավոր է, որ նա այլ ազգանունով է հանդես գալիս», — ասված է հաղոդագրությունում:
Հակաահաբեկչական կենտրոնի բանակցային խմբի ղեկավար Յուրի Տանդիտը հաստատում է այս տեղեկությունը: Ըստ նրա՝ Ալեքսեյ Պորոշենկոն իրեն համեստ է պահում: Նախագահը ոչ մի տեղ չի նշել որդու ծառայության մասին, հավելել է նա:
Չնայած որ Պորոշենկո կրտսերը բանակ է գնացել, նա պատգամավորի իր իրավասությունները վայր չի դրել:
Ավելի վաղ զորակոչի ծանուցում էր ստացել Գերագույն Ռադայի խոսնակ Ալեքսանդր Տուրչինովի 21-ամյա որդին՝ Կիրիլը: Ուկրաինայի պաշտպանության նախարար Վալերի Գելետեյի ավագ որդուն՝ Ալեքսանդրին, նույնպես զորակոչել են բանակ:
Հայտնի է նաեւ, որ «Կիեւ-1» ջոկատում է ծառայում ներքին գործերի նախարար Արսեն Ավակովի 25-ամյա որդի Ալեքսանդրը: