Մարզահամերգային համալիրը շուտով կվերածվի հասարակական զուգարանի, եթե Պաշտպանության նախարարությունը զինվորներին բերի այնտեղ, իսկ ԴԱՀԿ ծառայության աշխատակիցներն այն պաշտպանեն այնպես, ինչպես հիմա են պաշտպանում: Այսօր՝ օգոստոսի 22-ին, լրագրողների հետ զրույցում նման մտահոգություն հայտնեց ՄՀՀ հասարակայնության հետ կապերի և լրատվության պատասխանատու Կորյուն Գրիգորյանը՝ անդրադառնալով ՄՀՀ-ն ՊՆ-ին հանձնելու կառավարության որոշմանը։
«Այն, ինչ-որ հիմա կատարվում է շենքի ներսում, նախկին սեփականատերերի օրոք ոչ մի վայրկյան տեղի չի ունեցել: Եվ ես մտահոգություն ունեմ, որ եթե զինվորներին բերեն, լցնեն ու էն ձեւ պաշտպանեն, ինչպես հիմա են պաշտպանում, մարզահամերգային համալիրը շուտով կդառնա մոտավորապես հասարակական զուգարան»,- ասաց Կորյուն Գրիգորյանը՝ ավելացնելով, որ յուրաքանչյուրը կարող է այցելել եւ տեսնել, թե ինչ գարշահոտություն է տիրում այնտեղ:
Կորյուն Գրիգորյանի խոսքով, իրենք շարունակելու են պայքարը իրավական հարթությունում եւ, եթե արդյունքի չհասնեն, ապա կդիմեն Եվրադատարան:
«Մենք մեր պայքարը շարունակելու ենք իրավական դաշտում եւ երբեւէ չենք իջնելու մեր դիրքերից: Եթե մեզ չբավականացնի Հայաստանի իրավական դաշտը, մենք կդիմենք Եվրադատարան, քանի որ ի տարբերություն Հայաստանի, Եվրոպայում ծանոթ, խնամի, բարեկամ հարաբերությունները չեն գործում»,- ասաց նա:
Անդրադառնալով պարտքի պատճառով ՄՀՀ-ն աճուրդի հանելու որոշմանը՝ հասարակայնության հետ կապերի պատասխանատուն նշեց, որ աճուրդի լոտում չի նշվել, որ կառույցը պատմամշակութային է:
«ՄՀՀ աճուրդի է հանվել որպես բազմաբնակարանային շենքի բնակարան, ու անգամ լոտում չի նշվել որպես պատմամշակութային արժեք, եւ սա ուղղակի խայտառակություն է, որ այն գնահատվել է իր իրական գնից մի քանի անգամ ցածր»,- ասաց Կորյուն Գրիգորյանը:
Կորյուն Գրիգորյանը դժգոհեց կառույցի աշխատակիցների հանդեպ ԴԱՀԿ վերաբերմունքից. «Մենք դժգոհ ենք այն հանգամանքից, որ մեզ նախքան վտարելը պետք է պատշաճ կերպով ծանուցեին, իսկ վտարման գործընթացը իրականացնում են կամ աճուրդի սկզբում, կամ վերջում, բայց ոչ կեսերին»:
ՄՀՀ ներկայացուցիչը զարմանքը հայտնեց, որ վարչապետին ուղղված իրենց երեք նամակներից ոչ մեկին Հովիկ Աբրահամյանը չի պատասխանել. «Մեր համար նորությունը այն է, որ մեր 3 նամակները, որոնք ուղղված են եղել ներկայիս վարչապետին, տեղ չեն հասել, որն ուղղակի աբսուրդի ժանրից է»,- ասաց Կորյուն Գրիգորյանը՝ ավելացնելով, որ նամակում իրենք բողոքում են ինչպես աճուրդի պայմաններից, այնպես էլ դատական գործընթացներից:
Կորյուն Գրիգորյանի կարծիքով, սա պայմանավորված է նրանով, որ ՄՀՀ-ն գտնվում է ՊՆ հաշվեկշռում. «Եթե խառնված է ՊՆ-ն, ուրեմն ամեն ինչ պարզ է. ամեն ինչ լինելու է դռնփակ. եւ ինչպես «Վանա լիճ» ռեստորանային համալիրի, Անվադողերի գործարանի դեպքում էր, որոնք անցել են Պաշտպանության նախարարությանը, այնպես էլ այս դեպքում ամեն ինչ լինելու է փակ ռեժիմի ներքո»,- ասաց Կորյուն Գրիգորյանը:
ՄՀՀ լրատվության պատասխանատուի խոսքով, իրենց առաջնային խնդիրն է պարզել, թե որտեղ են ՄՀՀ-ին տրված 25 մլն դոլարի վարկի մասին փաստող թղթերը. «Մենք երբեւէ չենք ասել, որ մենք պարտք չենք, մենք ուղղակի ուզում ենք հետաձգել մեր 10 մլրդ 200 մլն պարտքը, որը համարժեք է 25 մլն դոլարին: Եւ մեզ համար զարմանալի է այն փաստը, որ 2013 եւ 2014թթ սկսած՝ պետբյուջեում չկա նշված այդ գումարը, եւ դա հավանաբար արվել է Դավիթ Սարգսյանի ձեռքով»,- ասաց Կորյուն Գրիգորյանը:
Հիշեցնենք, որ Կարեն Դեմիրճյանի անվան մարզահամերգային համալիրը 7-րդ անգամ աճուրդի հանվելուց և գնորդ չգտնելուց հետո օգոստոսի 21-ի Կառավարության որոշմամբ հանձնվեց Պաշտպանության նախարարությանը: