Երեւանի Հյուսիսային պողոտան վերակառուցումից հետո կկանաչի: Այս մասին օգոստոսի 22-ին լրագրողներին հայտնել է ՀՀ քաղաքաշինության նախարար Նարեկ Սարգսյանը՝ ներկայացնելով պաշտոնավարման 100 օրվա արդյունքները:
Ըստ նրա՝ վերակառուցման ավարտից հետո՝ հոկտեմբերին, պողոտան ամբողջությամբ կկերպարանափոխվի:
«Թփերի փոխարեն ծառեր կհայտնվեն: Մենք կանաչով կպատենք նաեւ շենքերի պատերը՝ նոր տեխնոլոգիայի օգնությամբ: Ծաղիկներով խոշոր զամբյուղներ կտեղադրենք: Բացի դրանից, նոր լապտերներ կհայտնվեն», - նշել է նախարարը:
Նշենք, որ քանի տարի է Հյուսիսային պողոտան քննադատվում է՝ որպես «հին Երեւանի շիրմաքար». այն կառուցելու համար քանդվել են տասնյակ հին տներ, իսկ դրանց բնակիչները՝ վտարվել առանց փոխհատուցման: Քար չեն խնայել, սակայն չեն տնկել անգամ մեկ ծառ: Դա պողոտան «անկրկնելի» է դարձրել Երեւանում օգոստոսյան շոգին զբոսնելու համար: