Նոյեմբերի 5-ի գործով ամբաստանյալ, «Ազգային միացյալ նախաձեռնության» ղեկավար Շանթ Հարությունյանն իր բոլոր գաղափարակիցներին կոչ է անում դատավճռի օրը գնալ դատարան: Այս մասին այսօր՝ օգոստոսի 22-ին, Կենտրոն եւ Նորք Մարաշ համայնքների ընդհանուր իրավասության դատարանում հայտարարեց Շանթ Հարությունյանը:
«Մեր հետագա գործողությունների պատասխանը մենք չենք կրելու, իշխանությունն է կրում: Մենք էս շենքից կարող ենք սկսել հեղափոխությունը: Կոչ եմ անում դատավճիռը կայացնելու ժամանակ գալ էստեղ: Ես դեռ ժամանակ կունենամ ձեզ ուրիշ կոչեր անելու: Իրենք դեռ կստանան Երեւանի փողոցներում էն, ինչից ինձ զրկում են»,-ասաց Շանթ Հարությունյանը: Նրա խոսքը վրդովված ընդհատեց դատավորը:
«Դուք անկարգությունների կոչ եք անում»,-ասաց Մնացական Մարտիրոսյանը, սակայն Շանթ Հարությունյանը շարունակեց իր հայտարարությունը. «Ես հլը անկարգությունների կոչ չեմ արել»: Չսպասելով նրա հայտարարության ավարտին՝ դատավորը հայտարարեց, որ դատական նիստն ավարտված է:
Հիշեցնենք, որ «Ազգային միացյալ նախաձեռնության» ղեկավար Շանթ Հարությունյանը, 2013թ. նոյեմբերի 5-ին, իր մոտ հարյուր աջակիցների հետ Գայ Ֆոքսի դիմակներով «Անոնիմուսների երթ» էր սկսել դեպի նախագահի նստավայր։ Սակայն ոստիկանները Մաշտոցի պողոտայում կասեցրել էին երթը, տեղի էին ունեցել բախումներ, հնչել էին պայթյուններ, ոստիկանները բերման էին ենթարկել 38 ակտիվիստների, այդ թվում՝ Շանթ Հարությունյանին եւ նրա որդուն։ Բախումների հետեւանքով տուժել էր 16 մարդ, այդ թվում ութ ոստիկան: Նրան առաջադրված մեղադրանքը վերաորակվել է եւ մեղադրանք է առաջադրվել Քրեական օրենսգրքի 258-րդ հոդվածի 4-րդ մասի հատկանիշներով՝ զենքի կամ որպես զենք օգտագործվող առարկաների գործադրմամբ խուլիգանությունը:
