Հայաստանը կարող է կրկնակի անգամ մեծացնել մրգերի, բանջարեղենի, պահածոների, հյութերի, գինու եւ կոնյակի արտահանումը Ռուսաստան: Այդ մասին այսօր՝ օգոստոսի 22-ին, մամուլի ասուլիսի ժամանակ հայտարարեց Հայաստանի գյուղատնտեսության նախարար Սերգո Կարապետյանը՝ ամփոփելով Հովիկ Աբրահամյանի կառավարության կազմում իր աշխատանքի առաջին 100-րդ օրը: Նրա խոսքով՝ արեւմտյան պարենային ապրանքների նկատմամբ ռուսական պատժամիջոցների պայմաններում Հայաստանի դիրքերը ռուսական շուկայում կարող են էլ ավելի հզորանալ:
Նախարարն ընդգծեց, որ այդ շուկան Հայաստանի համար նորույթ չէ. տարիներով եւ տասնամյակներով Ռուսաստանը եղել եւ մնում է հայկական պարենի գլխավոր արտահանողը: «Տարբեր տարիներին, դեռ խորհրդային ժամանակներում մենք Ռուսաստան ենք արտահանել մեր պտուղ-բանջարեղենային արտադրանքի 70-75%-ը», - հայտարարեց նախարարը:
Այդ առիթով նախարարը հավելեց, որ արտահանման կրկնակի ավելացումը լիովին իրատեսական է ոչ միայն մրգերի ու պահածոների, այլ նաեւ բանջարեղենի դեպքում: «Ուստի մենք կոչ ենք անում մեր պահածոների գործարաններին ուշադրություն դարձնել բանջարեղենային նախուտեստների պահածոյացմանը: Մեր ռուս գործընկերները հավաստիացնում են, որ դրանց պահանջարկը ռուսական շուկայում կայուն բարձր կլինի», - հավելեց նախարարը:
