2014թ. Հայաստանի գյուղնախարարության կողմից մեկնարկել է գյուղացիներին արտոնյալ լիզինգի պայմաններով գյուղտեխնիկայի տրամադրման ծրագիրը: Այդ մասին այսօր՝ օգոստոսի 22-ին, մամուլի ասուլիսի ժամանակ հայտարարեց Հայաստանի գյուղատնտեսության նախարար Սերգո Կարապետյանը՝ ամփոփելով Հովիկ Աբրահամյանի կառավարության կազմում իր աշխատանքի առաջին 100-րդ օրը: Նա նշեց, որ վերջին երկու տարվա ընթացքում Հայաստան է ներկրվել մոտ 300 տրակտոր, մոտ ժամանակներս այդ թիվը կավելանա եւս 80-ով: «Գյուղացիների համար գյուղտեխնիկայի հասանելի լիզինգի ծրագիրը մեզ համար շատ կարեւոր եւ մենք այն կշարունակենք», -հավելեց Կարապետյանը:
Նա նշեց, որ արտոնյալ ծրագրերով գյուղտեխնիկայի տրամադրման գործում առաջնահերթությունը կտրվի կոոպերատիվներին: Հողամասերի տրոհվածությունը (հանրապետությունում մոտ 340 գյուղացիական տնտեսություններ են գործում) նվազեցնում է մշակման արդյունավետությունը եւ բարձրացնում բերքի ինքնարժեքը:
«Կոոպերատիվը ինքնանպատակ չէ, այն կարող է լինել արդյունավետ, եթե հիմնված լինի ընդհանուր շահի, ընդհանուր պատասխանատվության վրա: Ուստի, մենք խթան ենք, տալիս, իսկ որոշողն, իհարկե, գյուղացին է», - հայտարարեց նախարարը: