Հրազդանի «Ցեմենտ սերվիս» ընկերության աշխատակիցներին այսօր՝ օգոստոսի 22-ին, վճարել են 2 ամսվա աշխատավարձը՝ պարտք մնալով եւս երեք ամսվա աշխատավարձ։
«Մեզ տվել են մարտ ամսվա կեսը, մեկ էլ՝ ապրիլ ամիսը, իսկ մնացածից տեղեկություն չունենք, ոչ մի բան չեն ասել, դե երկուշաբթի պարզ կլինի, թե մնացածը երբ կտան։ Ճիշտ ա՝ քիչ ա, բայց որ էս էլ տվեցին, էլի բանա»,- NEWS.am-ին պատմեցին գործարանի բանվորները:
Նշենք, որ գործարանի աշխատակիցներին դեռ օգոստոսի 5-ին կազմակերպած բողոքի ակցիայի ժամանակ խոստացել էին վճարել ամբողջ պարտքը առաջիկա երկուշաբթի, սակայն վճարել ենն միայն այսօր և միայն 2 ամսվա պարտքը:
Գործարանի աշխատակիցները հույս ունեն գործարանի ճակատագրի վերաբերյալ հարցերի պատասխանը ստանալ երկուշաբթի՝ օգոստոսի 25-ին. խոսակցություններ կան, որ երկուշաբթի գործարանը վերագործարկվելու է, սկսելու է աշխատել, իսկ թե ով է դրա ներկայիս սեփականատերը, գործարանի աշխատողները նախկինի պես անտեղյակ են:
«Ոչ լինում ա՝ դուրս գանք, ոչ էլ մնանք, անելանելի վիճակում ենք»,- դժգոհեցին նրանք։
Նշենք, որ ցեմենտի գործարանը 2013թ. սնանկ ճանաչվելուց հետո գրավադրվել է, այնուհետեւ անցել «ՎՏԲ-Հայաստան Բանկի» կառավարմանը՝ վերանվանվելով «Ցեմենտ սերվիս» ՍՊԸ։