Պերուի Կուսկո քաղաքում սարսափելի դեպք է տեղի ունեցել: Կրկեսի ներկայացման ժամանակ առյուծը հարձակվել է դպրոցի ուսուցչուհի Ռոքսանա Գեւարայի վրա, ով իր դասարանի աշակերտներին բերել էր ներկայացման: Ճակատագրի հեգնանքով՝ վարժեցնողը կնոջը հրավիրել է արենա՝ ցուցադրելու, որ գիշատիչը միանգամայն անվնաս է: Այս մասին գրում է Mirror-ը:
«Վարժեցնողն ինձ ասաց. «Մի անհանգստացեք, այս առյուծը շատ հնազանդ է, մենք այս հնարքը բազմաթիվ անգամներ կատարել ենք»,- պատմել է ներկայում հիվանդանոցում գտնվող Ռոքսանա Գեւարան:
Vesti.ru-ի փոխանցմամբ, գիշատիչ կենդանին կրծքի եւ պարանոցի հատվածում խորը վնասվածք է հասցրել կնոջը, եւ նրան հրաշքով է հաջողվել ողջ մնալ:
Սմիթ անունով առյուծը բռնել է կնոջ կոկորդից եւ սկսել է քարշ տալ վանդակով: Վարժեցնողը փայտով սարսափելի հարվածներ է հասցրել կենդանուն այնքան ժամանակ, մինչեւ գիշատիչը բացել է երախը:
Միջադեպի առիթով Պերուի իշխանությունները հետաքննություն են անցկացրել եւ պարզել, որ կրկեսի ղեկավարությունը խախտել է 2011 թվականին ընդունված օրենքը, որի համաձայն՝ ներկայացումներում վայրի կենդանիներին ներգրավելը խստիվ արգելվում է: Արդյունքում ոստիկանությունը Կուսկոյի կրկեսից երեք առյուծ եւ մեկ կապիկ է առգրավել:
