Չնայած Արեւելյան գործընկերության երկրներում տնտեսական անորոշությանը՝ կյանքի բավարարվածության մակարդակները, ըստ «Եվրոպական հարեւանության բարոմետր» հետազոտությունների չորս փուլերի արդյունքների, ընդհանուր առմամբ մնացել են համեմատաբար անփոփոխ: Այսօր մարդկանց 44 տոկոսը գոհ է իր կյանքից, ինչը 2 տոկոսով պակաս է 2013 թվականի գարնան համեմատ, իսկ 54 տոկոսը դժգոհ է, ինչը 2 տոկոսով ավելի է: Այս մասին գրում է վրացական «The Financial» պարբերականը:

Պարբերականի համաձայն՝ կարծիքներում բացասական փոքր տեղաշարժը կարող է վկայել այն մասին, որ Արեւելյան գործընկերության երկրներում սկսել է տնտեսական երկարատեւ անորոշության ընդհանուր տրամադրություն ձեւավորվել: Հարցումների վերջին փուլի տվյալներն այս հետազոտության շրջանակում հավաքվել են 2014-ի սկզբին, այնպես որ՝ ուկրաինական կոնֆլիկտի խորացումը, անկասկած, էական ազդեցություն կունենա միլիոնավոր մարդկանց վրա ոչ միայն Ուկրաինայում, այլ նաեւ հարեւան երկրներում:

Ըստ պարբերականի, հետազոտության 4 փուլերի ընթացքում Արեւելյան գործընկերության երկրները բաժանվել են 2 ճամբարի. մեծամասնությամբ դժգոհ եւ գոհ քաղաքացիներով երկրներ: «Այս խմբերը մնացել են անփոփոխ, ինչը հիմք է տալիս ենթադրել, որ կյանքից բավարարվածության մակարդակը, հնարավոր է, այդքան էլ կախված չէ մակրոտնտեսական գործոններից: Բավարարված երկրներ են Հայաստանը (64 տոկոս), Ադրբեջանը (62 տոկոս), Ռուսաստանը (57 տոկոս) եւ Բելառուսը (50 տոկոս), իսկ դժգոհ երկրներն են Վրաստանը (66 տոկոս), Մոլդովան (61 տոկոս) եւ Ուկրաինան (58 տոկոս): Բելառուսը միակ երկիրն է, որտեղ հետազոտության փուլերի ընթացքում նկատվող բացասական միտումը շարունակվում է արդի փուլում (-8): Ուկրաինայում, Հայաստանում եւ Վրաստանում հետազոտության վերջին երկու փուլերի ընթացքում փոփոխություններն աննշան են եղել»,- գրում է վրացական պարբերականը: