ԵՄ-ի հետ Ուկրաինայի ասոցացումից Ռուսաստանի կորուստները կարող են հասնել մինչեւ100 միլիարդ ռուբլի: ԵՄ-ի ստանդարտներին Ուկրաինայի տնտեսության անցումը 10 տարվա ընթացքում երկրին կարժենա 165 միլիարդ եվրո, հայտարարել է Ռուսաստանի նախագահ Վլադիմիր Պուտինը Մաքսային միության երկրների առաջնորդների եւ Ուկրաինայի նախագահի միջեւ հանդիպման ժամանակ, հաղորդում է «ԻՏԱՌ-ՏԱՍՍ»-ը:
«Հարվածի տակ կընկնեն մեր արդյունաբերության եւ ագրոարդյունաբերական համալիրի ամբողջական հատվածներ՝ տնտեսական աճի եւ զբաղվածության բոլոր բացասական հետեւանքներով», - ընդգծել է Պուտինը: Նա նաեւ նշել է, որ դա կվնասի նաեւ Մաքսային միության երկրների տնտեսությանը: «Կորուստներ կունենան ե´ւ Բելառուսը, ե´ւ Ղազախստանը», - նշել է նախագահը:
Պուտինը Մաքսային միության երկրների (Ռուսաստան, Բելառուս, Ղազախստան) եւ Ուկրաինայի փոխգործակցության աճը օգտակար է համարում, սակայն կասկածում է, որ դա հնարավոր է ԵՄ-ի հետ այդ երկրի ասոցացման պայմաններում:
Պուտինի խոսքով՝ Եվրամիության հետ Կիեւի համաձայնության իրացման դեպքում Ռուսաստանը հարկադրված կլինի պատասխան քայլեր ձեռնարկել: Մասնավորապես, նա հաղորդել է, որ Մաքսային միության երկրները ստիպված կլինեն չեղարկել Ուկրաինայից ներմուծման նախապատվությունը՝ ԱՊՀ-ի՝ ազատ առեւտի գոտու համաձայնության եւ ԱՀԿ նորմերին լիովին համապատասխան:
Հիշեցնենք, որ օգոստոսի 26-ին Մինսկում անց է կացվում Մաքսային միության անդամ երկրների, Ուկրաինայի առաջնորդների եւ ԵՄ-ի ներակայացուցիչների միջեւ հանդիպումը: