Պյոտր Պորոշենկոն առաջարկել է պայմանավորվել դիտորդական խմբի ստեղծման մասին, որը կգնահատի ԵՄ-ի հետ Ուկրաինայի ասոցացումից Մաքսային միության հնարավոր կորուստները:
«Այսօր մենք կարող ենք պայմանավորվել դիտորդական խմբի ստեղծման մասին, որը կգնահատի իրական, այլ ոչ թե հիպոտեթիկ հնարավոր կորուստը, - ասել է Պորոշենկոն: - Եւ երբ այդ կորուստը կարձանագրվի, այնժամ խոսել փոխհատուցման կամ պաշտպանական մեխանիզմների մասին»:
Պորոշենկոյի գնհատմամբ, Մաքսային միության հետ առեւտրաշրջանառությունը նվազել է 30%-ով: «Ինչը շահավետ չէ ոչ Ուկրաինայի, եւ ոչ էլ Մաքսային միության մեր գործընկերների համար: «Ոչ մի դեպքում չի կարելի թույլ տալ առեւտրային պայմանների հետագա վատթարացում», - ընդգծել է նախագահ Պորոշենկոն, հաղորդում է «ԻՏԱՌ-ՏԱՍՍ»-ը:
Պորոշենկոն հատուկ նշել է, որ «այսօրվա դրությամբ ԱՊՀ-ի իրավական բազայի ադապտացումը նոր պայմաններին, այդ թվում՝ նոր հատվածական համաձայնագրերի ստորագրության ուղիով, օրինակ, առեւտրում ոչ սակագնային խոչընդոտների հաղթահարման նպատակով, մեր ելակետային առաջնահերթություններից է»:
Մի կողմից ԵՄ-ի հետ ազատ առեւտրի գոտու եւ մյուս կողմից՝ Մաքսային միության երկրների միջեւ փոխգործակցության եւ համագործակցության մոդելի կառուցումը պետք է վերացնեն առեւտրային հարաբերությունների զարգացման խոչընդոտները, Ղազախստանի նախագահ Նուրսուլթան Նազարբաեւի հետ Մինսկում կայացած հանդիպման ժամանակ նշել է Պյոտր Պորոշենկոն:
