Ադրբեջանական լրատվամիջոցները հաղորդում են օգոստոսի 26-ի կեսօրին հայ-ադրբեջանական սահմանին Հայաստանի քաղաքացու գերեվարման մասին:
«Ենի Մուսավաթ» թերթի տվյալներով՝ խոսքը 53-54 տարեկան տղամարդու մասին է: Աղբյուրի փոխանցմամբ՝ քաղաքացին հայ-ադրբեջանական սահմանը հատել է Ղազախի շրջանի Քեմերլի գյուղի մոտ: Մոտ 20 րոպե նա մնացել է գյուղում, որից հետ նրան տարել են զինվորականները:
Հայկական կողմը ստուգում է ադրբեջանական կողմի տեղեկատվության արժանահավատությունը:
Այս անգամ, կրկին, ադրբեջանական լրատվամիջոցները շտապել են հայտարարել «դիվերսանտի» ձերբակալման մասին: Մի քանի շաբաթ առաջ Հայաստանի քաղաքացի, Չինարի գյուղի բնակիչ Կարեն Պետրոսյանը նույնպես «դիվերսանտ» էր հայտարարվել: Գերեվարման հաջորդ օրը ադրբեջանական կողմը հայտարարել էր գերու մահվան մասին: Կարեն Պետրոսյանի դեպքը միակը չի եղել՝ ավելի վաղ, ադրբեջանական բանտում մահացել է հովիվ Մանվել Սարիբեկյանը, իսկ հոգեկան հիվանդ եւ տարեց «դիվերսանտ» Մամիկոն Խոջոյանը վերադառնալուց քիչ ժամանակ անց մահացել է: