Գյուղատնտեսության նախարար Սերգո Կարապետյանն այսօր աշխատանքային այցով մեկնել է Լոռու մարզի մի շարք համայնքներ: Նա նախ այցելել է երկու անգամ կարկտահարությունից տուժած Ամրակից համայնք, ծանոթացել կարտոֆիլի բերքատվությանը, ինչպես նաեւ հետեւել կարտոֆիլի բերքահավաքի աշխատանքներին:
Ամրակից համայնքի ֆերմեր Գագիկ Գրիգորյանը տեղեկացրել է, որ այս տարի կարկտահարության պատճառով միջին բերքատվությունը մեկ հեկտարից կազմում է 80-100 ցենտներ, որը տեղական շուկայում իրացվում է 120 դրամով: Գյուղացիներն աջակցություն են խնդրել նախարարից գյուղատնտեսական վարկերի ժամկետների երկարաձգման հարցում: Սերգո Կարապետյանը խոստացել է խնդրի մասին տեղեկացնել Կենտրոնական բանկի նախագահին՝ դրան լուծում տալու համար:
Նախարարն այցելել է նաեւ Ստեփանավանում գործող «Ալպյան» կաթի վերամշակման արտադրամաս: Ընկերության գործադիր տնօրեն Աշոտ Սուքիասյանի տեղեկացմամբ, արտադրամասում տարեկան արտադրվում է 22 տոննա կաթի փոշի եւ 10 տոննա կարագ, իսկ կաթի մթերման տարեկան ծավալը կազմում է 250 տոննա: Այստեղ էլ Սերգո Կարապետյանին խնդրել են օժանդակել արտոնյալ վարկեր ստանալու խնդրում՝ կարագի արտադրության նոր հոսքագծի կառուցման համար:
Իսկ Տաշիրում գյուղնախարարը եղել է «Դուստր Մելանյա» ՍՊԸ կաթի վերամշակման արտադրամասում: Կազմակերպության տնօրեն Ռուբեն Հարությունյանի փոխանցմամբ, իրենք տարեկան 300 տոննա պանիր են արտադրում, որի մի մասն արտահանում են Ռուսաստան եւ ԱՄՆ: Տնօրենը նաեւ ընդգծել է, որ հաշվի առնելով Ռուսաստանում մի շարք երկրների գյուղատնտեսական մթերքների ներկրման սահմանափակումները` ընկերությունը նպատակ ունի ընդլայնել պանրի արտադրությունը եւ ավելացնել դեպի այդ երկիր արտահանման ծավալները:
Աշխատանքային այցի ընթացքում գերատեսչության ղեկավարը եղել է նաեւ Լոռու մարզի մի շարք այլ համայնքների ձեռնարկություններում, այցելել Տաշիր համայնքի «Բոզոյան» ընկերության հացահատիկի ցանքատարածություններ, հետեւել է բերքահավաքի եւ պահեսատավորման աշխատանքների ընթացքին: Ամփոփելով այցի արդյունքները՝ Սերգո Կարապետյանն ընդգծել է, որ շարունակում է առաջնահերթ խնդիր մնալ հացահատիկահավաք կոմբայնների ներկրումը՝ խոստանալով, որ առաջիկայում այդ հարցը նույնպես կլուծվի: