ՌԴ նախագահ Վլադիմիր Պուտինն իր ուկրաինացի գործընկեր Պյոտր Պորոշենկոյի հետ բանակցությունները դրական է գնահատել։Նա նշել է, որ երկու ժամ տեւած հանդիպման ընթացքում չեն քննարկվել Ուկրաինայի հարավ-արեւելքում հրադադարի պայմանները, հայտնում է «ՌԻԱ Նովոստին»։
«Մենք՝ Ռուսաստանը, չի կարող խոսել որեւէ պայմանի, Կիեւի, Դոնեցկի եւ Լուգանսկի միջեւ հնարավոր պայմանավորվածության մասին։ Մենք կարող ենք միայն նպաստել, որպեսզի վստահության մթնոլորտ ստեղծենք, իմ կարծիքով, այս հնարավոր եւ խիստ անհրաժեշտ բանակցությունների ընթացքում», — նշել է Պուտինը։
Պուտինը հայտարարել է, որ Ռուսաստանը կանի հնարավոր ամեն ինչ՝ խաղաղ գործընթացի եւ Ուկրաինայում արյունահեղությունը դադարեցնելու համար։ Նա ընդգծել է, որ «այս գործընթացը պետք է սկսել, որքան հնարավոր է արագ», որի համար Մինսկում կոնտակտային խումբ կհավաքվի։
«Մենք խոսել ենք Դոնեցկին եւ Լուգանսկին հումանիտար օգնություն ցուցաբերելու հնարավորության եւ անհրաժեշտության մասին, պայմանավորվել, թե ինչպես ենք փոխգործակցելու այդ հարցում», — ընդգծել է Պուտինը։
Նա նաեւ հույս է հայտնել, որ Արեւմուտքի երկրները հարգանքով կվերաբերվեն այն քայլերին, որոնք Ռուսաստանը ձեռնարկում է իր տնտեսությունը պաշտպանելու համար։
Ըստ Պուտինի՝ հանդիպման ընթացքում անդրադարձել են նաեւ գազային հարցին, որի քննարկման ժամանակ կողմերը եզրակացրել են, որ անհրաժեշտ է «վերսկսել էներգետիկայի վերաբերյալ երկխոսությունը», քանի որ կողմերը «փակուղում են գտնվում»։
«Մենք ամբողջությամբ կատարում ենք պայմանագրի բոլոր պայմանները։ Մենք նույնիսկ չենք կարող ընդունել զեղչերի որոշ առաջարկներ, քանի որ Ուկրաինան դիմել է Սթոքհոլմի դատարան։ Մեր ցանկացած զեղչային գործողություն կարող է օգտագործվել դատարանում», — ասել է Պուտինը, փոխանցում է ԻՏԱՌ-ՏԱՍՍ-ը։
