Վրաստանում Հայաստանի դեսպան, սպորտի եւ երիտասարդության հարցերի նախկին նախարար Յուրի Վարդանյանի որդու՝ ապօրինի թմրամիջոց ձեռք բերելու եւ իրացնելու համար մեղադրվող Դավիթ Վարդանյանի գործով դատախազը հաշվի չի առնում փաստը, որ մեղադրյալը մաքսանենգություն չի կատարել: Այս մասին NEWS.am-ին ասաց Դավիթ Վարդանյանի փաստաբան Վահան Հայրապետյանը՝ մեկնաբանելով դատախազի պահանջած պատիժը՝ 4,5 տարվա ազատազրկում:

«Դավիթ Վարդանյանը մաքսանենգություն չի կատարել, նա թմրանյութը ձեռք է բերել Հայաստանի տարածքում: Կարծում եմ՝ նախաքննական մարմինը սխալ ընթացք տվեց այս գործին, իսկ 4,5 տարին շատ-շատ է նման տեսակ հանցանքների համար: Սպասենք դատարանի որոշմանը»,- ասաց նա:

Յուրի Վարդանյանի որդու դատավճիռը կհրապարակվի սեպտեմբերի 4-ին:

Նշենք, որ գործով դատախազը պահանջում է ամբաստանյալին մեղավոր ճանաչել ՀՀ քրեական օրենսգրքի 215-րդ հոդվածի 2-րդ մասով` դատապարտել ազատազրկման 4 տարի ժամկետով, գույքը բռնագրավել եւ 268-րդ հոդվածի 3-րդ մասով` 2 տարի 6 ամիս ժամկետով: ՀՀ քրեական օրենսգրքի 66 հոդվածի 4-րդ մասի համաձայն` հանցանքների համակցությամբ նշանակված պատիժների մասնակիորեն գումարելու միջոցով վերջնական պատիժ նշանակել 4 տարի 6 ամիս ազատազրկում` հաշվի առնելով նաեւ անազատության մեջ գտնվելու ժամանակահատվածը:

Հիշեցնենք, որ Յուրի Վարդանյանի որդու՝ Դավիթ Վարդանյանի նկատմամբ 2013թ. հոկտեմբերի 15-ին քրեական գործ է հարուցվել Իրանից առանց իրացնելու նպատակով թմրանյութ ձեռք բերելու եւ մաքսանենգ ճանապարհով Հայաստան տեղափոխելու փորձի համար։ Նա կալանավորվել էր եւ տեղափոխվել «Երեւան կենտրոն» ՔԿՀ: