Սեւանա լճում իշխան ձկան բազմացման ծրագիրը վտանգավոր է սինթետիկ կերի պատճառով: Այդ մասին այսօր՝ օգոստոսի 27-ին, լրագրողներին հայտարարեց ջրային ռեսուրսների գծով փորձագետ, Համահայկական բնապահպանական ճակատի ներկայացուցիչ Քնարիկ Հովհաննիսյանը:

Նա նշել է, որ կերի մեջ ազոտի ու ֆոսֆորի համադրությունը կարող է բավականին վտանգավոր լինել: Աղտոտումը էլ ավելի է խորանում, քանի որ կերի մի մասը, որը ձուկը չի հասցնում սպառել, նստում է ջրի հատակը:

Իր հերթին, Հայաստանի ձկնաբույծների միության նախագահ Արթուր Աթոյանը հավելեց, առաջին 15 րոպեների ընթացքում ձկան կողմից չսպառված կերը հատակին վերածվում է աղբի:

Հիշեցնենք, որ 2013թ. դեկտեմբերին կառավարությունը հավանություն էր տվել պետություն-մասնավոր հատված գործընկերության հիման վրա Սեւանա լիճը ձկնաբուծարան դարձնելու ծրագրին: Նախագծին անհրաժեշտ ներդրումները մինչեւ 2023թ. գնահատվում են 66 մլրդ դրամ (մոտ 162 մլն դոլար): Արտադրանքի 75%-ը՝ թարմ, սառեցված, ապխտած, պահածոյացված ձկներ, ծրագրվում է արտահանվել:

Ծրագիրը նախատեսում է լճում իշխանի արտադրության ծավալները 10 տարվա ընթացքում (մինչեւ 2023թ) տարեկան հասցնել մինչեւ 50 հազար տոննա: