Ժամկետային զինծառայող Լյուքս Ստեփանյանի սպանության համար 17 տարվա ազատազրկման դատապարտված Դավիթ Խաչատրյանին տեղափոխել են «Դատապարտյալների հիվանդանոց» քրեակատարողական հիմնարկ, սակայն դեռ չեն վիրահատել: Այս մասին NEWS.am-ին ասաց Դավիթ Խաչատրյանի փաստաբան Երեմ Սարգսյանը:
Նրա փոխանցմամբ՝ իր պաշտպանյալն այս պահին վիրահատության կարիք ունի, սակայն ինչ-ինչ պատճառներով այն հետաձգվում է. «Հիմա վիճակը լավ չէ, սակայն վիրահատությունից հետո իրեն անհամեմատ լավ կզգա: Մենք էլ դիմել ենք Վերաքննիչ դատարան եւ սպասում ենք ծանուցմանը, թե երբ կսկսի դատավարությունը»:
Նշենք, որ Դավիթի մոտ ողնաշարի կիստա են ախտորոշել:
Ավելի վաղ NEWS.am-ը հաղորդել էր, որ ողբերգությունը կատարվել էր 2013թ. մայիսի 15-ին, ժամը 15:30-ի սահմաններում, Հայաստանի ՊՆ N զորամասի պահակախմբի մուտքի դիտորդ, ժամկետային զինծառայող, 19-ամյա շարքային Դավիթ Ռաֆայելի Խաչատրյանն իրեն ամրակցված ԱԿՄ տեսակի ինքնաձիգից կրակոց էր արձակել, ինչի հետեւանքով պահակախմբում ընդգրկված ժամկետային զինծառայող, շարքային Լյուքս Ստեփանյանը գլխի շրջանում ստացած հրազենային վիրավորումից տեղում մահացել էր, իսկ նույն զորամասի ժամկետային զինծառայող, շարքային Հրաչյա Վաղինակի Սարգսյանը գլխի շրջանում հրազենային վիրավորում էր ստացել: