Երեւանում, այսօր՝ օգոստոսի 27-ին, կայացել է «Ագրոմշակույթ» գյուղատնտեսական ամսագրի առաջին համարի շնորհանդեսը: Ամսագիրը ԱՄՆ-ի գյուղատնտեսության վարչության, «Ագրոբիզնեսի եւ գյուղերի զարգացման կենտրոն» (Center for Agribusiness and Rural Development - CARD) հիմնադրամի եւ Հայաստանի գյուղատնտեսության նախարարության միջեւ ակտիվ համագործակցության արդյունք է:

Միջոցառմանը մասնակցել են Հայաստանի գյուղատնտեսության նախարար Սերգո Կարապետյանը եւ Հայաստանում ԱՄՆ-ի արտակարգ ու լիազոր դեսպան Ջոն Հեֆերնը:

Նախարարը երախտագիտություն է հայտնել ԱՄՆ-ի գյուղատնտեսության վարչությանը: «ԱՄՆ-ի հետ համագործակցությունը էականորեն նպաստել է մեր երկրում գյուղատնտեսական արտադրանքի որակի բարելավմանը: Այսօր այդ գործը շարունակում է CARD-ը: Ամբողջ աշխարհի երկրների կառավարությունները մեծ ուշադրություն են դարձնում գյուղատնտեսությանը, քանի որ առկա է պարենային անվտանգության խնդիր: «Ագրոմշակույթ» ամսագիրը կծառայի իր նպատակներին՝ մարդկանց ծանոթացնելով ինչպես մեր գյուղացիական տնտեսությունների ձեռքբերումների, այնպես էլ նոր տեխնոլոգիաների ներդրումների հետ», - նշեց Սերգո Կարապետյանը:

ՀՀ-ում ԱՄՆ-ի դեսպան Ջոն Հեֆերնը, իր հերթին, ընդգծեց որ ամսագիրը նպատակաուղղված կլինի գյուղատնտեսության ոլորտում տեխնոլոգիաների զարգացման մասին տեղեկությունների տարածմանը, ինչպես նաեւ տեղական եւ միջազգային փորձի փոխանակությանը: «Հույս ունեմ, որ այդ ամսագիրը կդասվի մեր համատեղ հաջողությունների շարքին: CARD հիմնադրամի հետ մենք շարունակում ենք աջակցել Հայաստանի բոլոր մարզերի գյուղատնտեսությամբ զբաղվող ընտանիքներին», - եզրափակեց Հեֆերնը: