Հայկական մուրաբաներն ու մրգի եւ բանջարեղենի պահածոները Ռուսաստանում մեծ պահանջարկ ունեն նույնիսկ առանց լայն գովազդի: Այս մասին NEWS.am-ի թղթակցի հետ զրույցում հայտարարեց Ռուսաստանում Հայաստանի առեւտրային ներկայացուցիչ Կարեն Ասոյանը:
Հայկական արտադրանքը Մոսկվայում իրացվում է բարձրակարգ խանութներում (ինչպիսին է, օրինակ, Ելիսեեւսկին), որտեղ դժվար է հայտնվել ցածր վարկանիշ ունեցող մատակարարների համար, ինչպես նաեւ սպառողների լայն կազմ ունեցող ցանցերը՝ «Մետրո»-ն եւ «Աշան»-ը:
«Մոսկվայում մրգերի եւ բանջարեղենի պահածոների հայկական արտադրողներից նկատելի է միայն «Թամարա ֆրութի» գովազդը: Մյուսները գովազդային արշավներ գրեթե չունեն կամ շատ սահմանափակ են, սակայն, այնուամենայնիվ, նրանց ապրանքը բավական արագ իրացվում է: Սա նշանակում է, որ Հայաստանը դեռեւս մրգերի ու բանջարեղենի ապրանքանիշ է համարվում: Նույն Ելիսեեւսկիում մեր մուրաբաներն աչքի ընկնող տեղերում էին, քանի որ, ինչպես մեզ բացատրեցին, վաճառքում առաջատարներից են»,- նշեց Ասոյանը՝ հավելելով, որ շատ տարածված են նաեւ արցախյան արտադրության մուրաբաները:
