Հակաահաբեկչական գործողության շտաբից հայտարարել են, որ Ռուսաստանի տարածքից ծանր ռազմական տեխնիկայի 100 միավոր է ներխուժել Ուկրաինայի Դոնեցկի շրջան:
Ինչպես ավելի վաղ հայտարարել էին հակաահաբեկչական գործողության շտաբից, արձանագրվել է 100 միավոր տեխնիկայի շարասյուն (տանկեր, զրահափոխադրիչներ, «Գրադ», հետեւակի մարտական մեքենաներ): «RBK Ukraina»-ի փոխանցմամբ, զրահամեքենաների վրա կան ճանաչողական նշաններ՝ սպիտակ գույնի շրջաններ կամ եռանկյուններ:
Ավելի վաղ, ուկրաինական լրատվամիջոցները, վկայակոչելով Դոնեցկի սահմանապահ ստորաբաժանման 9937 մասի սահմանապահ Դմիտրիին, տարածել էին տեղեկատվություն, ըստ որի ռուսական զորքերի շարասյունը մտել է Ուկրաինայի տարածք: Ընդ որում, Դոնեցկի սահմանապահ ստորաբաժանման մամուլի ծառայությունը հայտարարել էր, որ նման տեղեկությունների չի տիրապետում: