ՆԱՏՕ-ն նախատեսում է Ուկրաինայի անվտանգության ամրապնդման, ԶՈՒ-ի արդիականացման քայլեր ձեռնարկել, նաեւ աջակցել Կիեւին Ռուսաստանի կողմից սպառնալիքներին դիմակայելիս, հայտարարել է Դաշինքի գլխավոր քարտուղար Անդերս Ֆոգ Ռասմուսենը:
«Եթե մենք 2 քայլ ենք հետ ռուսներից, ապա ուկրաինացիները՝ 16», — ասել է Ռասմուսենը Guardian-ի հետ հարցազրույցում:
Ըստ ՆԱՏՕ-ի գլխավոր քարտուղարի՝ Կարդիֆում դաշինքի կայանալիք գագաթաժողովում քննարկվելու է Արեւելյան Եվրոպայում նոր ռազմաբազաների տեղակայման հնարավորությունը: «Առանցքային պահն այն է, որ ապագայում դուք արեւելքում կզգաք ՆԱՏՕ-ի ավելի տեսանելի ներկայությունը», — հայտարարել է Ռասմուսենը, փոխանցում է Ռոսբալտը: Գլխավոր քարտուղարն ընդգծել է, որ Եվրոպայի արեւելքում զորքերի թիվն ավելացնելու նպատակն է հասկացնել ցանկացած հավանական ագրեսորի, որ դաշինքի անդամի վրա հարձակման դեպքում նրան կդիմավորեն ոչ միայն այդ երկրի զինված ուժերը, այլեւ դաշնակիցներինը: Նշենք, ՆԱՏՕ-ի գագաթաժողովին ներկայացվելու է դաշինքի գործողությունների ծրագիրը՝ «եվրոպական պետությունների անվտանգությունն ամրապնդելու» ուղղությամբ:
