Ղազախստանում բարյացակամ են Հայաստանի՝ Մաքսային միությանն անդամագրվելու կապակցությամբ, Ղազախստանի նախագահը ստորագրել է Հայաստանի անդամագրման ճանապարհային քարտեզը, այդ պատճառով ոչ մի տարաձանություն կամ հակազդեցություն չկա: Այս մասին այսօր՝ օգոստոսի 27-ին, լրագրողների հետ զրույցում հայտարարել է Հայաստանում Ղազախստանի դեսպան Ա.Ե. Բոզժիգիտովը, հաղորդում է A1+-ը:
«Տեխնիկական հարցերը ժամանակ են պահանջում՝ սկզբում փաստաթղթերի համաձայնեցում, հետո տարատեսակ ընթացակարգեր: Ոչ մի ձգձգում չկա, միայն տեխնիկական հարցեր են»,-հավելել է նա:
Նրա խոսքով՝ Ճանապարհային քարտեզը անձամբ Ղազախստանի նախագահն է ստորագրել»:
Անդրադառնալով Նազարբաեւի կողմից Ադրբեջանի նախագահ Իլհամ Ալիեւի հայտնի նամակի ընթերցմանը, դեսպանը նշել է. «Ամբողջ իմաստն այն է, որ նամակները կարող են ուղարկել տարբեր պետություններ, եւ ինչու բարձրացրեց Նազարբաեւը: Գագաթնաժողովն անցկացվում էր Աստանայում, մոդերատորը Նազարբաեւն էր, բնականաբար այդ նամակը նա է ստացել»:
Դիտարկմանը, թե Սերժ Սարգսյանը հայտարարում է, որ ոչ բոլորն են ուրախ Հայաստանին տեսնել Մաքսային միությունում, դեսպանը պատասխանել է․ «Դա ձեր նախագահի կարծիքն է՝ ով է ուրախ, ով ոչ: Մաքսային միությունը, հետագայում նաեւ Եվրասիական տնտեսական միությունը հիմնվում են պրագմատիկ իրականության վրա, մաքուր էկոնոմիկա է, ոչ մի քաղաքական հարց այստեղ դրված չէ: Ղազախստանը աջակցել է Հայաստանի՝ Մաքսային միությանն անդամագրվելու ճանապարհային քարտեզին: Դա փաստաթուղթ է, չէ՞, իսկ այն, ինչ դուք եք ասում, պարզապես խոսքեր են»:
Ինչ վերաբերում է Նազարբաեւի դիտարկմանը, որ Հայաստանը ՄՄ-ին պետք է անդամակցի իր միջազգայնորեն ճանաչված սահմաններով, Ղազախստանի դեսպանը նկատեց. «Ձեր նախագահն է ասել, որ Հայաստանն անդամագրվելու է Մաքսային միությանն իր սահմաններով»:
