Ուկրաինայի վարչապետ Արսենի Յացենյուկը Ռուսաստանին մեղադրել է գալիք ձմռանն իր երկրի տարածքով Եվրոպա գազի տարանցումը դադարեցնելու մտադրության համար: «Մենք գիտենք Ռուսաստանի մտադրությունները՝ այս ձմեռ գազի տարանցումը նույնիսկ ԵՄ անդամ երկրների համար ընդհանրապես դադարեցնելու մասին: Հենց դրա համար էլ նրանց ընկերություններին հրահանգվել է առավելագույն գազ պաշարել գազապահեստներում՝ Եվրոպայի տարածքում», - հայտարարել է նա կառավարության օգոստոսի 27-ի նիստն սկսվելուց առաջ:
Ըստ Յացենյուկի՝ Մոսկվան մտադիր է ամբողջությամբ դադարեցնել էներգապաշարների մատակարարումն Ուկրաինա: «Մենք գիտենք Ռուսաստանի ծրագրերի մասին, որոնց նպատակն է Ուկրաինան մեկուսացնել բոլոր էներգետիկ ռեսուրսներից», - ասել է նա: Յացենյուկը միաժամանակ նշել է, որ Ուկրաինան ԵՄ-Ռուսաստան-Ուկրաինա եռակողմ ձեւաչափով բանակցությունների շարունակման հույս ունի՝ էներգետիկայի բնագավառում վիճահարույց հարցերը լուծելու համար, հայտնում է «Ուկրաինսկայա պրավդան»: