«Վերին Լարսի» անցակետի փակումը կարող էր ազդել Հայաստանից Ռուսաստան կոնյակի արտահանման ծավալների վրա: Այս մասին NEWS.am-ի թղթակցին հայտնեց Ռուսաստանում Հայաստանի առեւտրային ներկայացուցիչ Կարեն Ասոյանը: Նրա խոսքով՝ Վրաստանից դեպի Ռուսաստան տանող մայրուղու գործունեության խափանումները չէին կարող չազդել արտահանման կազմակերպման վրա:
Երկրորդ պատճառը Ռուսաստանում ընդհանուր սպառողական պահանջարկի կրճատումն էր, որի մասին նշում են այդ երկրի կոմերցիոն բանկերի մի շարք վերլուծաբաններ, ինչպես նաեւ Տնտեսագիտության բարձրագույն դպրոցի մասնագետները: «Իհարկե, այս երկու պատճառներից գերակշռում էր Վերին Լարսի փակումը: Այն անմիջապես ազդում է մատակարարումների գրաֆիկի վրա»,- ընդգծեց Ասոյանը:
Նշենք, որ Հայաստանի մաքսային վիճակագրության տվյալների համաձայն՝ 2014թ. հունվար-հունիսին Հայաստանից Ռուսաստան կոնյակի արտահանման արժեքը կրճատվել է 11 տոկոսով (62.6-ից 55.5 մլն դոլար), իսկ բնականում՝ 20 տոկոսով (100 տոկոս սպիրտի հաշվարկով՝ 1000 լիտրում՝ 5207-ից մինչեւ 4207-ի նվազում):
Հիշեցնենք, որ Վրաստանից դեպի Ռուսաստան տանող մայրուղու Կազբեգի-Վերին Լարսի սահմանային լեռնանցքը մայիսի 17-ից մեկ ամսով փակ էր: Օգոստոսի 20-ի լույս 21-ի գիշերը ճանապարհը դարձյալ փակվեց սողանքի պատճառով, որը դեռ չի մաքրվել: