Ռուսաստանի արտգործնախարար Սերգեյ Լավրովը թվարկել է Ռուսաստանի դաշնակիցներին: Նրա խոսքով՝ դրանց թվում են Հավաքական անվտանգության պայմանագրի կազմակերպության անդամները, Եվրասիական ինտեգրացիոն նախագծերի շուրջ Ռուսաստանի գործընկերները, Շանհայի համագործակցության կազմակերպությունը եւ ԲՌԻՔՍ-ը:
Նախարարը նման հայտարարությամբ հանդես է եկել «Սելիգեր 2014» համառուսական երիտասարդական ֆորումի մասնակիցների հետ հանդիպման ժամանակ: Այս մասին գրում է «ՌԻԱ Նովոստի»-ն:
Ընդ որում, նախարարն ընդգծել է, որ Ռուսաստանը նորմալ է վերաբերում, երբ իր դաշնակիցները որոշ հարցերի շուրջ Մոսկվայից տարբեր կարծիք են ունենում: «Ահա, օրինակ, ՆԱՏՕ-ն միասնական դաշինքով է քվեարկում միշտ եւ ամենուր: Իսկ ովքե՞ր են Ռուսաստանի դաշնակիցները: Մենք շատ դաշնակիցներ ունենք: Եվ երբ պնդում են, որ ՀԱՊԿ-ի մեր դաշնակիցները միշտ չէ, որ քվեարկում են Ռուաստանի հետ դաշնաձայն, մենք այդ առիթով ոչ մի ողբերգություն չենք սարքում՝ ի տարբերություն ՆԱՏՕ-ի, որտեղ այլախոհության ցանկացած ցուցադրություն պատժելի է»,- նշել է Լավրովը:
ՀԱՊԿ-ին, բացի Ռուսաստանից, անդամակցում են եւս 5 երկիր՝ Հայաստանը, Ղազախստանը, Ղրղզստանը, Տաջիկստանը եւ Բելառուսը: Շանհայի համագործակցության կազմակերպության անդամ-երկրներն են Ռուսաստանը, Ղազախստանը, Տաջիկստանը, Ղրղզստանը, Ուզբեկստանը եւ Չինաստանը: ԲՌԻՔՍ-ին անդամակցում են Ռուսաստանը, Բրազիլիան, Հնդկաստանը, Չինաստանը եւ ՀԱՀ-ը: Իսկ Եվրասիական տնտեսական միության մեջ մտնում են Ռուսաստանը, Ղազախստանը եւ Բելառուսը:
