Ուկրաինայի Հայերի միության ներկայացուցիչներն օգոստոսի 27-ին Ուկրաինայի Կարմիր Խաչի հանրության աշխատակիցներին ավելի քան 90 տոննա մարդասիրական օգնություն են փոխանցել, որը նախատեսված է Դոնեցկի եւ Լուգանսկի մարզերի կարիքավորների համար: Դրանում ներառված են սննդամթերք, առաջին անհրաժեշտության իրեր եւ այլն: Այս մասին AnalitikaUA.net-ին տեղեկացրել են կազմակերպությունում:
Ավելի վաղ հաղորդվում էր, որ երկրի տարբեր շրջանների հայ համայնքները պարբերաբար մարդասիրական օգնություն են ցուցաբերում: Ավելի լայնածավալ օժանդակության տրամադրման համար որոշվել է համագործակցել Ուկրաինայի Կարմիր խաչի հանրության հետ:
Անցյալ շաբաթ Ուկրաինայի Հայերի միության նախագահ Վիլեն Շատվորյանը հանդիպել է Ուկրաինայի Կարմիր Խաչի հանրության նախագահ Իվան Ուսիչենկոյի հետ: Հանդիպման ընթացքում քննարկվել են Միության կողմից Ուկրաինայի արեւելյան շրջանների բնակիչներին մարդասիրական օգնության տրամադրման համակարգման աշխատանքների հետ կապված հարցեր:
Ուկրաինայի Հայերի միությունը Կարմիր Խաչին եւ մարզային համայնքներին շնորհակալություն է հայտնել օպերատիվ աշխատանքի համար: «Հայ ժողովուրդը հիշում եւ բարձր է գնահատում եղբայրական օգնությունը, որ Ուկրաինայից եւ ամբողջ աշխարհից փոխանցվել է մեր Հայրենիքի համար ծանր օրերին: Այդպիսի բաները երբեք չեն մոռացվում: Այսօր մենք ձգտում ենք օգնել ուկրաինացի ժողովրդին»,- հայտարարել է Շատվորյանը: