Թուրքիայի վարչապետի թեկնածու Ահմեդ Դավութօղլուն իշխող Արդարություն եւ զարգացում կուսակցության գլխավոր համագումարում կուսակցության նախագահ ընտրվելուց հետո ներկաներին է ներկայացրել իր 9 կետանոց մանիֆեստը:
Թուրքական Milliyet-ի փոխանցմամբ՝ իշխող կուսակցության նոր նախագահն իր 9 կետանոց մանիֆեստում ներկայացրել է կուսակցության առաջիկա նպատակները, որոնցում տեղ են գտել քրդական հարցի կարգավորումը, զուգահեռ կառույցի (Գյուլենի շարժում-խմբ) դեմ պայքարը, արդարադատության համակարգի բարեփոխումները, մշակույթային բարեփոխումները, տնտեսական բարեփոխումները եւ արտաքին քաղաքականությունը:
Աչքի է ընկել այն հանգամանքը, որ մանիֆեստում արտաքին քաղաքականության մասին մի քանի տողում նշվում է միայն Հայկական եւ Կիպրոսի խնդիրների մասին:
«2001 թվականից երբ ասում ենք արտաքին քաղաքականություն՝ հասկանում ենք արտաքին հարաբերություններ: Թուրքիայի ամբողջ արտաքին քաղաքական օրակարգը կազմված է Հայկական հարցից եւ Կիպրոսի հարցից: Երբեք չենք հրաժարվելու մեր հիմնական սկզբունքներից»,-հայտարարել է Դավութօղլուն: