Սահմանադրական բարեփոխումների հանրաքվեն կարող է որոշակի իրավիճակում դառնալ քառյակին բաժանող խնդիր: NEWS.am-ի հետ զրույցում նման կարծիք հայտնեց քաղաքական վերլուծաբան Ստյոպա Սաֆարյանը:
«Սահմանադրական բարեփոխումների հարցը բարձրացնելը պետք է հասկանալու, թե քաղաքական ուժերն ինչ կարծիք ունեն իշխանությունների մասին, թե ինչպես են պատրաստվում 2017-2018թթ. ընտրություններին: Երկու ուժեր հավակնում են իշխանության գալուն եւ ներկայիս կառավարման համակարգն իրենց ձեռնտու է: ԲՀԿ-ն այդ ուժերից մեկն է՝ նկատի ունենալով, որ Հովիկ Աբրահամյանը վարչապետն է, իսկ ԱԺ-ում էլ 2-րդն են իրենց ձայներով: ԲՀԿ-ն այս պահին առավելապես մտածում է, որ առաջիկա երկու ընտրություններին իշխանությունը կփոխանցվի իրեն: ՀՅԴ-ի համար հակառակը միեւնույնն է, թե ում այն կփոխանցվի, սակայն մտածում է, որ խորհրդարանական կառավարման համակարգի դեպքում իրենք ամեն դեպքում ավելի բարձր տեղ կզբաղեցնեն: Հենց այստեղից էլ սկսվում է տարաձայնությունը»,- ասաց նա:
Ստյոպա Սաֆարյանի խոսքով՝ Հայ ազգային կոնգրեսը դեմ է սահմանադրական բարեփոխումներին, որովհետեւ Լեւոն Տեր-Պետրոսյանը ցավագին է ընդունում, որ իր տեղծած համակարգը կարող է փոխվել:
«Ժառանգություն»-ը մեծ հաշվով կողմ է խորհրդարանական կառավարման համակարգին: Սակայն դեմ է 2 պատճառով. նախ մտավախություն ունի, որ այս իշխանությունն իր այս կերպ վերարտադրության խնդիրն է լուծում եւ Րաֆֆի Հովհաննիսյանի մրցակից Սերժ Սարգսյանը կպահպանի իր տեղը: Երկրորդ՝ «Ժառանգությունը» տեսնում է, որ այս բարեփոխումներին քառյակի 2 դոմինանտ ուժեր կողմ չեն եւ չպառակտելու համար քառյակը դեմ է արտահայտվում: Հետեւաբար, այս հարցը կարող է քառյակի պառակտման պատճառ դառնալ»,- ավելացրեց նա:
