Մերինոս ցեղատեսակի այս ոչխարը վեց տարեկան է եւ, ինչպես երեւում է, նրան երբեք չեն խուզել: Հայտնի չէ, թե կենդանու վրա որքան բուրդ կա: Ենթադրվում է՝ ավելի քան 25 կգ: Այս կենդանուն հայտնաբերել է ամուսնական զույգն Ավստրալիայից՝ Փիթեր եւ Նեթի Հազելները: Ոչխարը թափառելիս է եղել Թասմանիայի գյուղական տեղանքում՝ նահանգի մայրաքաղաք Հոբարթ քաղաքից 84 կմ հեռավորությամբ:
Ըստ «NTDTV.ru»-ի, առաջիկայում նախատեսում են խուզել ոչխարին: Զույգը հույս ունի, որ բուրդն ավելի քան 27 կգ կլինի եւ կգերազանցի նախորդ ռեկորդը: Այսօր «ամենաբրդոտը» համարվում է Նոր Զելանդիայից ոչխարը: Երբ 2004 թվականին նրան հայտնաբերել են քարանձավում, իր ցեղակիցներից շատ ավելի մեծ է թվացել: Կենդանուն անվանել են Շրեկ:
Նա առանձնացել էր հոտից եւ վեց տարի խուսափել խուզվելուց: Շրեկի 27 կգ կշռող բարակ բուրդը վաճառել են աճուրդի ժամանակ, իսկ ստացված գումարն ուղղել բարեգործությանը: Շրեկը սատկել է 16 տարեկանում. մարդկային տարիքի համեմատությամբ՝ սա համարժեք է 90 տարվա: